ଏମିତି ବର୍ବରତା ଦେଖି ଆତ୍ମା ବି କାନ୍ଦି ଉଠିବ । ଗଜପତି ଜିଲ୍ଲା ମୋହନା ଥାନା ଅନ୍ତଗର୍ତ କଟମା ଗ୍ରାମରେ ଏମିତି ଏକ କାଣ୍ଡ ଭିଆଇଛନ୍ତି ଦୁର୍ବୃତ୍ତ । ଜଣେ ପୂର୍ବତନ ୱାର୍ଡ ମେମ୍ବରଙ୍କୁ ହତ୍ୟା କରିବା ପରେ ମୃତଦେହର ବେକରେ ରଶି ବାନ୍ଧି ତାଙ୍କରି ବାଇକ୍ ପଛରେ ଘୋଷାଡ଼ି ଘୋଷାଡ଼ି ନେଇ ଜଙ୍ଗଲରେ ଫିଙ୍ଗିଛନ୍ତି । ମୃତକ ହେଲେ ଗଜପତି ଜିଲ୍ଲା ଅଡ଼ବା ଥାନା ତୁଆବାଡ଼ି ଗାଁର ତିରିସିଂ ମୁଠାମାଝୀ (୪୫) । ପୂର୍ବରୁ ସେ ତୁଆବାଡ଼ି ଗାଁର ୱାର୍ଡ ମେମ୍ବର ଭାବେ ନିର୍ବାଚିତ ହୋଇଥିଲେ ।

ରବିବାର ତିରିସିଂ ବାଇକ୍ ନେଇ ରାଇଗଣ୍ଡା ଓ ପାଣିଗଣ୍ଡା ବାହାରି ଯାଇଥିଲେ । ବିଳମ୍ବିତ ରାତି ପର୍ଯ୍ୟନ୍ତ ସେ ଘରକୁ ନଫେରିବାରୁ ପରିବାର ଲୋକେ ଖୋଜିଥିଲେ । ହେଲେ ତାଙ୍କର କୌଣସି ଅତାପତ୍ତା ମିଳିନଥିଲା । ସୋମବାର ସକାଳେ କିଛି ଲୋକ କଟାମା ଗାଁ ନିକଟରେ ତିରସିଂଙ୍କ ରକ୍ତ ଜୁଡୁବୁଡୁ ମୃତଦେହ ଦେଖିଥିଲେ । ପାଖରେ ତାଙ୍କ ବାଇକ୍ ପଡ଼ିଥିଲା । ଘଟଣାସ୍ଥଳରୁ ରକ୍ତଭିଜା ଚପଲ, ରୁମାଲ, ମାଟି, ହତ୍ୟାରେ ବ୍ୟବହୃତ ଠେଙ୍ଗା, ମୃତକଙ୍କ ଆଧାର ଓ ପରିଚୟପତ୍ର ଜବତ କରାଯାଇଛି ।

ପରିବାର ଲୋକ କହିଛନ୍ତି ଯେ, ତିରିସିଂ ଏକ ହତ୍ୟା ଘଟଣାରେ ସାକ୍ଷୀ ହୋଇଥିଲେ । ତେଣୁ ତାଙ୍କୁ କେହି ହତ୍ୟା କରିଥିବା ଅଭିଯୋଗ ହୋଇଛି । ପୁଲିସ ଘଟଣା ସ୍ଥଳରେ ତଦନ୍ତ କରିବା ପରେ ଗାଁଠାରୁ ଅଧା କିଲୋମିଟର ଦୂର ଘାଟିରେ ରକ୍ତ ଛିଟା ଓ ହତ୍ୟାକାଣ୍ଡରେ ବ୍ୟବହୃତ ଠେଙ୍ଗା ପଡ଼ିଥିବା ଦେଖିବାକୁ ପାଇଛି ।

Powered by Froala Editor