ନୂଆଦିଲ୍ଲୀ: ଝାଡ଼ଖଣ୍ଡ ଲୋକସେବା ଆୟୋଗ(ଜେପିଏସସି) ପରୀକ୍ଷାର ପ୍ରଥମ ମହିଳା ଟପ୍ପର ଶାଳିନୀ ବିଜୟ, ତାଙ୍କ ଭାଇ ତଥା ଭାରତୀୟ ରାଜସ୍ବ ସେବା(ଆଇଆରଏସ) ଅଧିକାରୀ ମନୀଷ ବିଜୟ ଏବଂ ମା’ ଶକୁନ୍ତଳା ଅଗ୍ରୱାଲଙ୍କ ମୃତ୍ୟୁ ଘଟିଛି। ୩ ଜଣଙ୍କ ମୃତଦେହ କେରଳର କୋଚିସ୍ଥିତ ମନୀଷଙ୍କ ସରକାରୀ ବାସଭବନରୁ ଜବତ ହୋଇଛି। ଏହି ଘଟଣା କେରଳ ଏବଂ ଝାଡ଼ଖଣ୍ଡରେ ଚାଞ୍ଚଲ୍ୟ ସୃଷ୍ଟି କରିଥିବାବେଳେ ଏହା ଆତ୍ମହତ୍ୟା ନା ଆଉ କିଛି ରହସ୍ୟ ରହିଛି ତାହାକୁ ନେଇ ଚର୍ଚ୍ଚା ଜୋର ଧରିଛି।

ମନୀଷ କେନ୍ଦ୍ରୀୟ ଉତ୍ପାଦ ଶୁଳ୍ପ ଏବଂ ଜିଏସଟି ବିଭାଗର ଅତିରିକ୍ତ ସଚିବ ଭାବେ ନିଯୁକ୍ତ ହୋଇଥିଲେ। ଶାଳିନୀ ଝାଡ଼ଖଣ୍ଡ ସମାଜ କଲ୍ୟାଣ ବିଭାଗରେ ସହକାରୀ ନିର୍ଦେଶକ ପଦରେ ଅବସ୍ଥାପିତ ଥିଲେ। ଝାଡ଼ଖଣ୍ଡର ଏହି ପରିବାର କେରଳର ଏର୍ନାକୁଲମ ଜିଲାର କକ୍କାନାଡସ୍ଥିତ ସରକାରୀ ବାସଭବନରେ ରହୁଥିଲେ।

ଶାଳିନୀ ବିଜୟ ୨୦୦୬ରେ ଜେପିଏସସି ପରୀକ୍ଷାରେ ପ୍ରଥମ ସ୍ଥାନ ଅଧିକାରୀ କରିବା ସାଙ୍ଗକୁ ରାଜ୍ୟର ପ୍ରଥମ ମହିଳା ଟପ୍ପର ହୋଇଥିଲେ। ତାଙ୍କୁ ଡେପୁଟି କଲେକ୍ଟର ପଦରେ ନିଯୁକ୍ତି ମିଳିଥିଲା। ପରେ ତାହାକୁ ନେଇ ବିବାଦ ଆରମ୍ଭ ହୋଇଥିଲା। ପରବର୍ତ୍ତୀ ସମୟରେ ତାଙ୍କୁ ଚାକିରିରୁ ବାହାର କରାଯାଇଥିଲା। ୨୦୨୪ରେ ମାମଲାର ଚାର୍ଜସିଟ ଦାଖଲ କରାଯାଇଥିଲା। ଏହାର ଶୁଣାଣି ଜାରି ରହିଥିଲା। ଏହି ମାମଲାକୁ ନେଇ ସେ ଚିନ୍ତିତ ରହୁଥିଲେ।

ଅନ୍ୟପଟେ ଆଇଆରଏସ ଅଧିକାରୀ ମନୀଷ ୪ ଦିନ ଛୁଟିରେ ରହିବା ପରେ କାର୍ଯ୍ୟକୁ ଫେରି ନ ଥିଲେ। ଫଳରେ ତାଙ୍କ ସହଯୋଗୀ ମନୀଷଙ୍କ ବାସଭବନକୁ ଆସିଥିଲେ। ଯେଉଁଠାରେ ସେ ମନୀଷ, ଶାଳିନୀ ଏବଂ ଶକୁନ୍ତଳାଙ୍କ ମୃତଦେହ ଦେଖି ପୁଲିସକୁ ସୂଚନା ଦେଇଥିଲେ। ଶକୁନ୍ତଳାଙ୍କ ମୃତଦେହ ଖଟରେ ପଡ଼ିଥିବାବେଳେ ମନୀଷ ଏବଂ ଶାଳିନୀଙ୍କ ମୃତଦେହ ଝୁଲନ୍ତା ଅବସ୍ଥାରେ ମିଳିଥିଲା। ଘରୁ ଏକ ଡାଏରୀକୁ ପୁଲିସ ଜବତ କରିଛି। ଯେଉଁଥିରେ ଲେଖାଯାଇଛି ଯେ ସେମାନଙ୍କ ମୃତ୍ୟୁର ସୂଚନା ବିଦେଶରେ ରହୁଥିବା ସେମାନଙ୍କ ଭଉଣୀଙ୍କୁ ଅବଗତ କରାଯାଉ। ପାରିପାର୍ଶ୍ବିକ ସ୍ଥିତିରୁ ଏହା ଏକ ଆତ୍ମହତ୍ୟା ବୋଲି ପୁଲିସ ଅନୁମାନ କରିବା ସହିତ ଘଟଣାର ତଦନ୍ତ ଜାରି ରଖିଛି।

Powered by Froala Editor