ଆମ ଆଦମୀ ପାର୍ଟିର ପ୍ରାର୍ଥୀଙ୍କୁ ବିଜେପି କିଣିବା ପାଇଁ ଉଦ୍ୟମ କରୁଥିବା ଅଭିଯୋଗ ପରେ ଏହାର ତଦନ୍ତ ଲାଗି ଦୁର୍ନୀତି ନିବାରଣ ବ୍ୟୁରୋ ବା ଏସିବିକୁ ନିର୍ଦ୍ଦେଶ ଦେଇଛନ୍ତି ଲେଫଟନାଣ୍ଟ ଗଭର୍ଣ୍ଣର ଭି.କେ. ସକ୍ସେନା। ଏସିବିର ଏକ ଟିମ ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲଙ୍କ ବାସଭବନରେ ପହଞ୍ଚିଛନ୍ତି। ତେବେ ଏହି ଟିମକୁ କେଜରିୱାଲ ଘରେ ପ୍ରବେଶ କରିବାକୁ ଦେଇ ନଥିବା ସୂଚନା ମିଳିଛି।

ଏସିବି ବା ଆଣ୍ଟିକରପଶନ ବ୍ୟୁରୋ ଅଧିକାରୀମାନେ ଅରବିନ୍ଦ କେଜରିୱାଲଙ୍କ ଘରେ ଆସି ବସିଥିଲେ। ତାଙ୍କୁ ପ୍ରଶ୍ନ ପଚାରିଥିଲେ। ତାଙ୍କୁ ପଚରାଗଲା ଯେ ତୁମେ ଯେଉଁ ଅଭିଯୋଗ ଆଣିଛ ତା’ ପଛରେ କ’ଣ ପ୍ରମାଣ ଅଛି? ଆମ ଆଦମୀ ପାର୍ଟିର ଆଇନଗତ ମୁଖ୍ୟ ସଞ୍ଜୀବ ନାସିଆର ଏ ବିଷୟରେ କିଛି ସୂଚନା ଦେଇଛନ୍ତି। ସେ ଅନେକ ଗମ୍ଭୀର ଅଭିଯୋଗ ମଧ୍ୟ ଲଗାଇଛନ୍ତି।

ଆମ ଆଦମୀ ପାର୍ଟିର ଆଇନଗତ ମୁଖ୍ୟ ସଞ୍ଜୀବ ନାସିଆର କହିଛନ୍ତି, ଏହା ବହୁତ ଆଶ୍ଚର୍ଯ୍ୟଜନକ। ଦୁର୍ନୀତି ନିବାରଣ ବ୍ୟୁରୋ (ଏସିବି) ଅଧିକାରୀମାନେ ଗତ କିଛି ଘଣ୍ଟା ଧରି ସେଠାରେ ବସିଥିଲେ। ତାଙ୍କ ପାଖରେ କୌଣସି କାଗଜପତ୍ର କିମ୍ବା ନିର୍ଦ୍ଦେଶ ନଥିଲା। ସେ ଫୋନରେ କାହା ସହିତ ଲଗାତାର କଥା ହେଉଥିଲେ। ଆମେ ସେମାନଙ୍କୁ ତଦନ୍ତ ପାଇଁ ନୋଟିସ ମାଗିଥିଲୁ କିନ୍ତୁ ସେମାନଙ୍କ ପାଖରେ କିଛି ନଥିଲା।

ଆପର ୭ ପ୍ରାର୍ଥୀଙ୍କୁ ୧୫ କୋଟି ଲେଖାଏ ଟଙ୍କାରେ କିଣିବାକୁ ବିଜେପି ଥୋପ ପକାଉଥିବା ନେଇ ଆପ୍ ସାଂସଦ ସଞ୍ଜୟ ସିଂ ଅଭିଯୋଗ କରିବା ପରେ ଦିଲ୍ଲୀ ରାଜନୀତିରେ ହଇଚଇ ସୃଷ୍ଟି ହୋଇଥିଲା। ସେପଟେ କେଜରିୱାଲ ବି ଅଭିଯୋଗ କରିଥିଲେ ମନ୍ତ୍ରୀ କରିବା ଲାଗି ଆପର ୧୬ ପ୍ରାର୍ଥୀଙ୍କୁ ବିଜେପି ପକ୍ଷରୁ ୧୫ କୋଟି ଲେଖାଏ ଟଙ୍କା ଯଚାଯାଉଛି। ଦିଲ୍ଲୀ ବିଜେପି ସମ୍ପାଦକ ବିଷ୍ଣୁ ମିତ୍ତଲଙ୍କ ଅବିଯୋଗ କ୍ରମେ ଲେଫଟନାଣ୍ଟ ଗଭର୍ଣ୍ଣର ତଦନ୍ତ ନିର୍ଦ୍ଦେଶ ଦେଇଥିଲେ ।

Powered by Froala Editor