ଅନୁରୋଧ ରକ୍ଷା କଲାନି ପୁଲିସ, ଗିରଫ କରିବାକୁ ବେଡ୍ରୁମ୍ ଯାଏ ପଳାଇଲା
ପୁଷ୍ପା-୨ ଫିଲ୍ମର ସ୍କ୍ରିନିଂ ଅବସରରେ ଜଣେ ମହିଳାଙ୍କ ମୃତ୍ୟୁ ଘଟିବା ସହ ତାଙ୍କ ପୁଅ ଗୁରୁତର ଆହତ ହୋଇଥିଲେ। ଏହି ଘଟଣାରେ ଏବେ ସାଉଥ୍ ସୁପର୍ଷ୍ଟାର୍ ଅଲ୍ଲୁ ଅର୍ଜୁନଙ୍କୁ ଗିରଫ କରାଯାଇଛି। ତାଙ୍କୁ ଗିରଫ କରିବା ପାଇଁ ବେଡ୍ ରୁମ୍ ପର୍ଯ୍ୟନ୍ତ ପଳାଇଥିଲା ପୁଲିସ। ଏମିତି ତାଙ୍କୁ ପୋଷାକ ବଦଳାଇବାକୁ ମଧ୍ୟ ସମୟ ଦେଇ ନଥିଲା। ତାଙ୍କୁ ଗିରଫ କରାଯିବା ବେଳର ଏକ ଭିଡିଓ ସାମ୍ନାକୁ ଆସିଛି।
ନିଜ ଗିରଫଦାରୀ ପରେ ସୁପରଷ୍ଟାର ଅଲୁ ଅର୍ଜୁନ କୋର୍ଟଙ୍କୁ କହିଛନ୍ତି ଯେ ଗତ ସପ୍ତାହରେ ଜଣେ ମହିଳାଙ୍କର ତାଙ୍କ ସିନେମାର ପ୍ରିମିୟର୍ ସୋ’ରେ ମୃତ୍ୟୁ ଘଟିଥିବା ଘଟଣାରେ ପୁଲିସ୍ ତାଙ୍କ ‘ବେଡ୍ରୁମ୍’ରେ ପଶି ତାଙ୍କୁ ଗିରଫ କରିଛି। ସୋମବାର ପର୍ଯ୍ୟନ୍ତ ତାଙ୍କ ଗିରଫଦାରୀକୁ ସ୍ଥଗିତ ରଖିବାକୁ କୋର୍ଟରେ ଆବେଦନ କରିଥିବା ଅଲ୍ଲୁ ଅର୍ଜୁନ ଏହି ମନ୍ତବ୍ୟ ଦେଇଛନ୍ତି।
ସୂଚନା ଅନୁଯାୟୀ, ଅଲ୍ଲୁଙ୍କୁ ଗିରଫ କରିବାକୁ ଯାଇଥିବା ପୁଲିସ୍ ଅଧିକାରୀ ତାଙ୍କର ସମସ୍ତ ଅନୁରୋଧ ରକ୍ଷା କରାଯିବ ବୋଲି ପ୍ରତିଶ୍ରୁତି ଦେଇଥିଲେ। କିନ୍ତୁ ତାଙ୍କର କୌଣସି ଅନୁରୋଧ ପୁଲିସ ରକ୍ଷା ନ କରିବାରୁ ଅଲ୍ଲୁ ଉପରୋକ୍ତ କଥା କହିଥିବା ଜଣାପଡ଼ିଛି।
ପୁଲିସ୍ ଅଲ୍ଲୁଙ୍କୁ ଗିରଫ କରି ଘର ବାହାରକୁ ଆଣିବା ବେଳେ ତାଙ୍କ ହାତରେ ଏକ କପ୍ ଥିଲା। ସେ କଫି ପିଉଥିଲେ। ତାଙ୍କ ସହିତ ତାଙ୍କ ବାପା, ଭାଇ ଓ ପତ୍ନୀ ମଧ୍ୟ ଥିଲେ। ଅଲ୍ଲୁ ଅର୍ଜୁନଙ୍କୁ ଗିରଫ କରିବା ପରେ ପୁଲିସ ତାଙ୍କୁ ଥାନାକୁ ନେଇଥିଲା।
Powered by Froala Editor
