ହାତୀ ଶିକାର ବନବିଭାଗ ପାଇଁ ଚିନ୍ତାର ବିଷୟ । ଯେତେ ସତର୍କ ରହିଲେ ବି ଶିକାରୀ ତାର ଚାଲ୍ ଚଲେଇଥାଏ । କିନ୍ତୁ ଏଥର ହାତୀଦାନ୍ତ ବେପାରୀକୁ ଫସିଯାଇଛି ବନବିଭାଗ ହାତରେ । ଗ୍ରାହକ ସାଜି ଶିକାରୀକୁ ଫାସରେ ପକାଇଛି । କେନ୍ଦୁଝର ଜିଲ୍ଲା ଆନନ୍ଦପୁର ବନ ବିଭାଗ ଏଭଳି ଜାଲ ବିଛାଇ ଜଣେ ଶିକାରୀକୁ ଗିରଫ କରିଛି । ତାଠାରୁ ଦୁଇଟି ହାତୀ ଦାନ୍ତ ମଧ୍ୟ ଜବତ ହୋଇଛି ।

ଗିରଫ ବୋକରୀ ଘଟଗାଁ ଥାନା ମେଲଣ ଗ୍ରାମର ସୁଧା ମାଙ୍କିଡିଆ । ସେ ଚୋରାରେ ହାତୀ ଦାନ୍ତ ବ୍ୟବସାୟ କରୁଥିବାବେଳେ ବନ ବିଭାଗକୁ ସୂଚନା ମିଳିଥିଲା । ବନ ବିଭାଗ ବେପାରୀକୁ ଧରିବାକୁ ଜାଲ ବିଛାଇଥିଲା । ତେଣୁ ଜଣେ ବ୍ୟକ୍ତିଙ୍କୁ ଖରିଦାର ଭାବେ ଉପସ୍ଥାପନ କରିଥିଲା ବନ ବିଭାଗ ।

୨୦ ନଂ ଜାତୀୟ ରାଜପଥର ଘସିପୁରା ଥାନା ଧକୋଠା ସ୍ଥିତ ତ୍ରିରଙ୍ଗା ଢାବା ନିକଟରେ ଡିଲ୍ କରିବାକୁ ହୋଇଥିଲା ପ୍ରସ୍ତୁତି । ଢାବା ନିକଟରେ ଦୁଇ ଗୋଟି ହାତୀଦାନ୍ତ ଧରି ସୁଧା ପହଞ୍ଚିଥିଲା । ଏହି ସମୟରେ ସାଧା ପୋଷାକରେ ଥିବା ବନ ବିଭାଗ ସୁଧାକୁ କାବୁ କରି ନେଇଥିଲା । ସୁଧା ନିକଟରୁ ବନ ବିଭାଗ ଦୁଇ ଗୋଟି ହାତୀ ଦାନ୍ତ ଜବତ କରିଥିବାବେଳେ ଏହାର ଓଜନ ପାଖାପାଖି ୧ କିଲୋ ହେବ ବୋଲି ସୂଚନା ମିଳିଛି ।

ସୂଚନାଯୋଗ୍ୟ ଯେ, ସୁଧା ପୂର୍ବରୁ ଘଟଗାଁ ବନାଞ୍ଚଳରେ ହାତୀଦାନ୍ତ ବିକ୍ରି କରୁଥିବା ସମୟରେ ଧର ପଡି ଜେଲ୍ ଯାଇଥିଲା । ପୁଣି ବନବିଭାଗ ଗିରଫ କରିବା ପରେ ଆଉ କେଉଁମାନେ ଏଥିରେ ସମ୍ପୃକ୍ତ ଅଛନ୍ତି ତାହା ଜାଣିବାକୁ ତଦନ୍ତ କରାଯାଉଛି ।

Powered by Froala Editor