ନୂଆଦିଲ୍ଲୀ : ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପୁନର୍ବାର ବିଶ୍ବର ସବୁଠାରୁ ଲୋକପ୍ରିୟ ରାଜନେତା ଭାବେ ବିବେଚିତ ହୋଇଛନ୍ତି। ଆମେରିକା ରାଷ୍ଟ୍ରପତି ଜୋ ବାଇଡେନ୍‌ ଓ ୟୁକେ ପ୍ରଧାନମନ୍ତ୍ରୀ କିର ଷ୍ଟାର୍ମରଙ୍କୁ ପଛରେ ପକାଇ ମୋଦୀ ଏହି କୃତିତ୍ବ ହାସଲ କରିଛନ୍ତି। ମର୍ଣ୍ଣିଂ କନ୍‌ସଲ୍ଟ ନାମକ ଏକ ଅନ୍ତର୍ଜାତୀୟ ସଂସ୍ଥା ତରଫରୁ ଜୁଲାଇ ୮ରୁ ୧୪ ମଧ୍ୟରେ ବିଶ୍ବର ସବୁଠାରୁ ଲୋକପ୍ରିୟ ରାଜନେତା ମନୋନୟନ ପାଇଁ ଏକ ସର୍ଭେ କରାଯାଇଥିଲା। ଏଥିରେ ବିଶ୍ବର ୨୫ଜଣ ରାଜନେତାଙ୍କୁ ସାମିଲ କରାଯାଇଥିଲା। ସର୍ଭେରୁ ମୋଦୀ ସର୍ବାଧିକ ୬୯% ଆପ୍ରୁଭାଲ ରେଟିଙ୍ଗ ହାସଲ କରି ପ୍ରଥମ ସ୍ଥାନରେ ରହିଥିବା ବେଳେ ମେକ୍ସିକୋ ରାଷ୍ଟ୍ରପତି ଆନ୍ଦ୍ରେସ ମାନୁଏଲ ଲୋପେଜ୍‌ ଓବରାଡୋର ୬୩% ରେଟିଙ୍ଗ ହାସଲ କରି ଦ୍ବିତୀୟ ସ୍ଥାନରେ ରହିଛନ୍ତି। ତୃତୀୟ ସ୍ଥାନରେ ଥିବା ଆର୍ଜେଣ୍ଟିନା ରାଷ୍ଟ୍ରପତି ଜାଭିଏର ମିଲେଇ ୬୦%, ଚତୁର୍ଥ ସ୍ଥାନରେ ଥିବା ସୁଇଜରଲାଣ୍ଡର ଫେଡେରାଲ କାଉନସିଲର୍‌ ଆମହର୍ଡ ୫୨%, ପଞ୍ଚମ ସ୍ଥାନରେ ଥିବା ଆୟରଲାଣ୍ଡର ସିମୋନ ହାରିସ୍‌ ୪୭%, ଷଷ୍ଠ ସ୍ଥାନରେ ଥିବା ୟୁକେ ପ୍ରଧାନମନ୍ତ୍ରୀ କିର ଷ୍ଟାର୍ମର ୪୫%, ସପ୍ତମ ସ୍ଥାନରେ ଥିବା ପୋଲାଣ୍ଡର ଡୋନାଲ୍ଡ ଟସ୍କ ୪୫%, ଅଷ୍ଟମ ସ୍ଥାନରେ ଥିବା ଅଷ୍ଟ୍ରେଲିଆର ପ୍ରଧାନମନ୍ତ୍ରୀ ଆନ୍ଥୋନୀ ଆଲ୍‌ବାନେସ୍‌ ୪୨%, ନବମ ସ୍ଥାନରେ ଥିବା ସ୍ପେନର ପ୍ରଧାନମନ୍ତ୍ରୀ ପେଡ୍ରୋ ସାଞ୍ଚେଜ୍‌ ୪୦% ଓ ଦଶମ ସ୍ଥାନରେ ଥିବା ଇଟାଲୀର ମେଲୋନୀ ୪୦% ଆପ୍ରୁଭାଲ ରେଟିଙ୍ଗ ହାସଲ କରିଛନ୍ତି। ଜାପାନର ପ୍ରଧାନମନ୍ତ୍ରୀ ଫୁମିଓ କିସିଦା ୧୬% ରେଟିଙ୍ଗ ପାଇ ସବୁଠାରୁ ନିମ୍ନ ସ୍ଥାନରେ ରହିଛନ୍ତି। ସୂଚନାଥାଉ କି ଗତବର୍ଷ ହୋଇଥିବା ସର୍ଭେରେ ମଧ୍ୟ ମୋଦୀ ବିଶ୍ବର ସବୁଠାରୁ ଲୋକପ୍ରିୟ ରାଜନେତା ହେବାର ସୌଭାଗ୍ୟ ହାସଲ କରିଥିଲେ।

Powered by Froala Editor