ଲକ୍ଷ୍ନୌରେ ଗତ ବୁଧବାର ପ୍ରବଳ ବର୍ଷା ଯୋଗୁ ବିଭିନ୍ନ ସ୍ଥାନରେ ପାଣି ଜମି ରହିଥିଲା। ଯେଉଁ କାରଣରୁ ଲୋକେ ନାହିଁ ନଥିବା ସମସ୍ୟାର ସମ୍ମୁଖୀନ ହୋଇଥିଲେ। ସେହି ସମୟରେ କିଛି ଯୁବକ ସବୁ ସୀମା ପାର୍ କରିଯାଇଛନ୍ତି । ଏକାଠି ହୋଇ ଯୁବତୀଙ୍କ ଉପରକୁ ପାଣି ଫିଙ୍ଗିଛନ୍ତି । ଏହି ମାଲାରେ ପୁଲିସ ୪ ଜଣଙ୍କୁ ଗିରଫ କରିଛି।

ତାଜ ହୋଟେଲ ନିକଟରେ ଥିବା ରାସ୍ତାରେ ପାଣି ଜମି ବନ୍ୟା ପରିସ୍ଥିତି ସୃଷ୍ଟି ହୋଇଥିଲା। କିଛି ଲୋକ ରାସ୍ତାରେ ଜମିଥିବା ପାଣିରେ ମଜା ମସ୍ତି କରୁଥିଲେ। ଏତିକି ବେଳେ ବାଇକ୍‌ରେ ଜଣେ ଯୁବକ ଏବଂ ଯୁବତୀ ସେହି ରାସ୍ତା ଦେଇ ଯିବା ସମୟରେ ତାଙ୍କୁ ଲୋକେ ଘେରି ଯାଇଥିଲେ। ଯୁବତୀଙ୍କ ସହ ସେମାନେ ଅସଦାଚରଣ କରିଥିଲେ। ପଛପଟୁ ତାଙ୍କ ବାଇକ୍‌ ଟାଣିବା ସହ ତାଙ୍କ ଉପରକୁ ରାସ୍ତା ଉପରେ ଜମି ରହିଥିବା ବର୍ଷା ପାଣି ଫିଙ୍ଗିଥିଲେ। ଫଳରେ ଗାଡ଼ିଚଲାଉଥିବ‌ା ଯୁବକ ଓ ପଛରେ ବସିଥିବା ଯୁବତୀ ଭାରସାମ୍ୟ ରକ୍ଷା କରି ନପାରି ବର୍ଷା ପାଣି ଭିତରେ ପଡ଼ି ଯାଇଥିଲେ।

ଏହି ଘଟଣା ସମ୍ପର୍କରେ ପୁଲିସ ଖବର ପାଇ ଘଟଣାସ୍ଥଳ‌ରେ ପହଞ୍ଚି ତୁରନ୍ତ ଯୁବକ ଏବଂ ଯୁବତୀଙ୍କୁ ଉଦ୍ଧାର କରିଥିଲା। ଏଥିସହିତ ଏହି ଘଟଣାରେ ସମ୍ପୃକ୍ତ ଥିବା ୪ଜଣଙ୍କୁ ଗିରଫ କରିବା ସହିତ ଆଉ କିଛିଜଣଙ୍କୁ ଅଟକ ରଖିଛି। ପୁଲିସ ଏକ ତିନି ଜଣିଆ ଟିମ୍ ଗଠନ କରି ତଦନ୍ତ ଜାରି ରଖିଛି।

ଏହି ଘଟଣାରେ ଉତ୍ତରପ୍ରଦେଶ ପୁଲିସ ଗୁରୁବାର ତିନିଜଣ ଅଧିକାରୀଙ୍କ ସମେତ ପାଞ୍ଚ ଜଣ କର୍ମଚାରୀଙ୍କୁ ନିଲମ୍ବିତ କରିଛି। ଡେପୁଟି କମିଶନର (ଡିସିପି) ପ୍ରବଲ ପ୍ରତାପ ସିଂ, ଅତିରିକ୍ତ ଡିସିପି ଅମିତ କୁମାୱତ ଏବଂ ଗୋମତି ନଗରର ଆସିଷ୍ଟାଣ୍ଟ ପୁଲିସ କମିଶନର ଅନସୁ ଜୈନଙ୍କୁ ସେମାନଙ୍କ ପଦରୁ ହଟାଇ ଦିଆଯାଇଛି। ଏଥିସହ ଗୋମତି ନଗରର ଏସଏଚଓ ଦୀପକ କୁମାର ପାଣ୍ଡେ, ଷ୍ଟେସନ ଦାୟିତ୍ୱରେ ଥିବା ଋଷି ବିବେକ, ସବ୍-ଇନ୍ସପେକ୍ଟର କପିଲ କୁମାର ଏବଂ କନଷ୍ଟେବଳ ବିରେନ୍ଦ୍ର କୁମାର ଏବଂ ଧରମବୀରଙ୍କୁ ନିଲମ୍ବିତ କରାଯାଇଛି।

Powered by Froala Editor