ଗଞ୍ଜାମ ଜିଲ୍ଲା କବିସୂର୍ଯ୍ୟନଗର ବୃନ୍ଦାବତୀ ବିଦ୍ୟାପୀଠ ନିକଟ ଜଟେଶ୍ୱର ପୋଖରୀ ହୁଡ଼ା ଚାନ୍ଦନି ନିକଟରେ ଜଣେ ଯୁବକଗୁ ଗୁଳି କରି ହତ୍ୟା କରାଯାଇଛି । ମୃତକ ହେଲେ ତ୍ରିନାଥ ମଲ୍ଲିକ । ଏହି ଗୁଳିମାଡ଼ ପରେ ଭୟଭୀତ ହୋଇପଡ଼ିଛନ୍ତି ଅଞ୍ଚଳବାସୀ । ତ୍ରିନାଥଙ୍କ ନାମରେ ଅନେକ ଅପରାଧିକ ମାମଲା ରହିଥିବା ବେଳେ ପୂର୍ବ ଶତ୍ରୁତାରୁ ତାଙ୍କୁ ହତ୍ୟା କରାଯାଇଥିବା ସନ୍ଦେହ କରାଯାଉଛି ।

ତ୍ରିନାଥଙ୍କ ଘର କବିସୂର୍ଯ୍ୟନଗରରେ । କିଛିମାସ ହେଲା ସେ ବାପା-ମାଆଙ୍କଠାରୁ ଅଲଗା ହୋଇ ଚଢ଼େୟାପଡ଼ା ଗାଁରେ ଭଡ଼ା ଘରେ ରହୁଥିଲେ । ବୁଧବାର ହରିହର କଳାକେନ୍ଦ୍ରରୁ ଏକାଦଶାହ ଭୋଜି ଖାଇ ଜଟେଶ୍ୱର ପୋଖରୀ ହୁଡ଼ାରେ ଅପରାହ୍ନରେ ବସି ତାସ୍ ଖେଳୁଥିଲେ । ଏହି ସମୟରେ ଅଜଣା ଯୁବକଙ୍କ ହଠାତ୍ ବାଇକ୍‌ରେ ଆସି ତ୍ରିନାଥଙ୍କୁ ଅତି ନିକଟରୁ ଗୁଳି କରିଥିଲା । ଗୋଟିଏ ମୁଣ୍ଡକୁ ଓ ଆଉ ଗୋଟିଏ ଗୁଳି ଛାତିକୁ ବାଜିଥିଲା । ତ୍ରିନାଥ ସେଠାରେ ଟଳି ପଡ଼ିଥିଲେ ।

କବିସୂର୍ଯ୍ୟନଗର ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି । ପୁଲିସ ଘଟଣାସ୍ଥଳରୁ ଜୋତା, ଖୋକା, ମୋବାଇଲ୍ ଜବତ କରିଛି । ମୃତକଙ୍କ ଶବ ଜବତ କରି ବ୍ୟବଚ୍ଛେଦ ନିମନ୍ତେ କବିସୂର୍ଯ୍ୟନଗର ଡାକ୍ତରଖାନା ପଠାଯାଇଛି । ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯିବ ବୋଲି ପୁଲିସ କହିଛି । ତେବେ ଦାଦାବଟି ଆଦାୟକୁ କେନ୍ଦ୍ର କରି ହତ୍ୟା ହୋଇଥିବା ପୁଲିସ ତଦନ୍ତରେ ଜଣାପଡ଼ିଛି ।  

Powered by Froala Editor