ଚଣ୍ଡିଖୋଲ ବୈରୀ ରେଞ୍ଜ ଶାଳପଡ଼ା ପଞ୍ଚାୟତ ଚାରିଗୋଚ୍ଛିଆ ଜଙ୍ଗଲକୁ ଦୁଇ ଯୁବକ ଯାଇଥିବାବେଳେ ହାତୀ ଜଣଙ୍କୁ ଦଳି ମାରିଦେଇଛି । ମୃତ ଯୁବକ ଜଣକ ବନ୍ଧପଲି ଗ୍ରାମ ଆଦିବାସୀ ସାହିର ରବି ବିନ୍ଧାଣୀ(୩୨) । 

ଶନିବାର ଭୋରରୁ ରବି ବିନ୍ଧାଣୀ ଓ ଟୁକୁ ହେମ୍ବ୍ରମ ଚାରିଗୋଚ୍ଛିଆ ଜଙ୍ଗଲକୁ ଯାଇଥିଲେ । ରବି ଆଗରେ ଯାଉଥିବା ବେଳେ ଏକ ଦନ୍ତାହାତୀ ତାଙ୍କୁ ହଠାତ୍ ଟେକି କଚାଡ଼ି ଦେଇଥିଲା । ରବି ତଳେ ପଡ଼ିବା ମାତ୍ରେ ହାତୀଟି ରବିଙ୍କୁ ଦଳି ପକାଇ ଥିଲା । ଘଟଣାସ୍ଥଳରେ ରବିଙ୍କର ମୃତ୍ୟୁ ଘଟିଥିଲା । 

ଆଖିସାମ୍‌ନାରେ ରବିଙ୍କ ମୃତ୍ୟୁ ଦେଖି ଟୁକୁ ଥରହର ହୋଇଉଠିଥିଲା । ତଥାପି ସାହାସ ବାନ୍ଧି ସେଠାରୁ ଜୀବନ ବିକଳରେ ଗାଁ ଆଡ଼କୁ ଦୌଡ଼ି ଆସି ଗ୍ରାମବାସୀଙ୍କୁ ଘଟଣା ସମ୍ପର୍କରେ ଜଣାଇଥିଲେ । ଗ୍ରାମବାସୀ ବୈରୀ ବନ ବିଭାଗ ଓ ପୁଲିସକୁ ଖବର ଦେଇ ଜଙ୍ଗଲକୁ ଭିତରକୁ ଯାଇଥିଲେ । ସେତବେଳକୁ ହାତୀଟି ଜଙ୍ଗଲ ଭିତରକୁ ପଳାଇ ଯାଇଥିଲା । ବନ ବିଭାଗ ରବିଙ୍କ ମୃତଦେହ ଜବତ କରିବା ସହ ମୃତକଙ୍କ ପରିବାରକୁ କ୍ଷତିପୂରଣ ଦିଆଯିବ ବୋଲି କହିଛନ୍ତି । ପ୍ରଥମ କିସ୍ତି ଅନୁଯାୟୀ ରବିଙ୍କ ପତ୍ନୀ ପ୍ରିୟା ବିନ୍ଧାଣୀଙ୍କୁ ୬୦ ହଜାର ଟଙ୍କା ଦିଆଯାଇଛି । 

କିନ୍ତୁ ପୁଅକୁ ହରାଇ ରବିଙ୍କ ପତ୍ନୀ ଓ ପରିବାର ସମ୍ପୂର୍ଣ୍ଣ ଭାଙ୍ଗି ପଡିଛନ୍ତି । ରବି କାହିଁକି ଜଙ୍ଗଲକୁ ଯାଇଥିଲେ ଜଣାପଡିନାହିଁ । ତଥାପି ଜୀବନଜୀବିକା ପାଇଁ ସେ ଟୁକୁ ସହିତ ପ୍ରାୟତଃ ଜଙ୍ଗଲୀ ଜିନିଷ ସଂଗ୍ରହ କରିବାକୁ ଯାଆନ୍ତି । ଛତୁ ଆଣିବାକୁ ସେ ଭୋର୍‌ରୁ ଯାଇଥିବା ପରିବାର ଲୋକେ କହୁଛନ୍ତି । ତଥାପି ବନବିଭାଗ ତଦନ୍ତ କରୁଛି । 

Powered by Froala Editor