ଘର ଭିତରକୁ ପଶିଗଲା ଟ୍ରକ୍, କାନ୍ଥ ପଡ଼ି ମହିଳା ମୃତ
ମୟୂରଭଞ୍ଜ ଜିଲ୍ଲା ରାଇରଙ୍ଗପୁରରେ ଭାରସାମ୍ୟ ହରାଇ ଏକ ଟ୍ରକ୍ ଜଣଙ୍କ ଘରେ ପଶିଯିବାରୁ ମହିଳାଙ୍କ ମୃତ୍ୟୁ ଘଟିଛି । ରାଇରଙ୍ଗପୁର ଟାଉନ୍ ଆଦର୍ଶ ଥାନା ଅନ୍ତର୍ଗତ ଦାଣ୍ଡବୋଷ ଗ୍ରାମ ଛକ ନିକଟରେ ଶନିବାର ଘଟିଛି ଏଭଳି ଅଭାବନୀୟ ଘଟଣା । ମୃତ ମହିଳା ହେଲେ କମଳା ପାତ୍ର (୫୮) ।
ସୂଚନାଯୋଗ୍ୟ, ଆଦର୍ଶ ଥାନା ଅଞ୍ଚଳ ଦେଇ ରାଞ୍ôଚ-ବିଜୟୱାଡ଼ା ୨୨୦ନମ୍ବର ଜାତୀୟ ରାଜପଥ ଯାଇଛି । ଏହି ରାସ୍ତାରେ ଦୈନିକ ଶତାଧିକ ମାଲବାହୀ ଭାରୀଯାନ ଚଳାଚଳ କରୁଛି । ଶନିବାର ଭୋର୍ ପ୍ରାୟ ୪ଟାରେ ଟାଟାରୁ ଲୁହାପଥର ଖାଲି କରି ଏହି ଟ୍ରକ୍ ଦ୍ରୁତଗତିରେ ଫେରୁଥିଲା । କିନ୍ତୁ ଡ୍ରାଇଭର ଗାଡ଼ି ଉପରୁ ନିୟନ୍ତ୍ରଣ ହରାଇବାରୁ ରାସ୍ତାକଡ଼ରେ ଥିବା କମଳାଙ୍କ ଘର ଭିତରକୁ ପଶି ଯାଇଥିଲା । ଟ୍ରକ୍ ଧକ୍କାରେ ଘର କାନ୍ଥ ଭୁଶୁଡ଼ି ପଡ଼ିବାରୁ ଭିତରେ ଚାପି ହୋଇଯାଇଥିଲେ କମଳା । କମଳାଙ୍କ ସହ ପରିବାରର ୬ଜଣ ଆହତ ହୋଇଛନ୍ତି । ସମସ୍ତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିବାବେଳେ ସେଠାରେ ଡାକ୍ତର କମଳାଙ୍କୁ ମୃତ ଘୋଷଣା କରିଥିଲେ ।
ଏଭଳି ଅଭାବନୀୟ ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା । ମୃତକଙ୍କ ଆତ୍ମୀୟ ଏବଂ ସ୍ଥାନୀୟ ବାସିନ୍ଦା କ୍ଷତିପୂରଣ ଦାବିରେ ଦୀର୍ଘ ୬ଘଣ୍ଟା ରାସ୍ତା ଅବରୋଧ କରିଥିଲେ । ପୁଲିସ୍, ମାଜିଷ୍ଟ୍ରେଟ୍ ଦାୟିତ୍ୱରେ ଥିବା ତହସିଲ୍ଦାର ପହଞ୍ôଚ ବୁଝାସୁଝା କରିବା ପରେ ପରିସ୍ଥିତି ନିୟନ୍ତ୍ରଣକୁ ଆସିଥିଲା ।
ଏହି ଘଟଣା ପରେ ରାସ୍ତାକଡରେ ଥିବା ପରିବାରଙ୍କ ମନରେ ଛନକା ପଶିଛି । ରାତିରେ ପାଟ୍ରୋଲିଂ ହେଉନଥିବାରୁ ଦୁର୍ଘଟଣା ଘଟୁଛି । ଏପରିକି ଭାରୀଯାନ ଚଲାଉଥିବା ଡ୍ରାଇଭରଙ୍କ ଚେକିଂ ହେଉନଥିବାରୁ ମଦ୍ୟପ ଚାଳକ ଏଭଳି ଘଟଣାମାନ ଘଟାଉଛନ୍ତି । ଯେଉଁଥିପାଇଁ ଏଭଳି ଦୁର୍ଘଟଣା ହେଉଛି ବୋଲି କୁହାଯାଉଛି ।
Powered by Froala Editor
