ବାହାଘର ମିଠା ହେଲା ବିଷ, ୨୮ରୁ ଊର୍ଦ୍ଧ୍ୱ ଆକ୍ରାନ୍ତ
ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ବ୍ଲକ କୁଶାମାଲ ଗାଁରେ ବାହାଘର ବେଳେ ଘଟିଛି ଅଘଟଣ । ମିଠାଖାଇ ୨୮ରୁ ଊର୍ଦ୍ଧ୍ୱ ଝାଡ଼ାବାନ୍ତିରେ ଆକ୍ରାନ୍ତ ହୋଇଛନ୍ତି । ଆକ୍ରାନ୍ତଙ୍କ ମଧ୍ୟରୁ ୧୭ଜଣ ଶିଶୁ ଥିବାବେଳେ ସମସ୍ତଙ୍କୁ ଡୁଙ୍ଗୁରିପାଲି ଡାକ୍ତରଖାନାରେ ଭର୍ତ୍ତି କରାଯାଇଛି ।
ଗତ ୧୨ ତାରିଖରେ କୁଶାମାଲ ଗାଁରେ ହୃଷୀକେଶ ଘିବେଲାଙ୍କ ପୁଅ ଲିଙ୍ଗରାଜଙ୍କ ବାହାଘର ହୋଇଥିଲା । ବାହାଘରରେ ବଳକା ରହିଯାଇଥିବା ମିଠାକୁ ମଙ୍ଗଳବାର ସକାଳେ ଘରକୁ ଘର ବଣ୍ଟା ଯାଇଥିଲା । ଏହି ମିଠା ଖାଇବା ପରେ ଗ୍ରାମବାସୀ ଝାଡ଼ାବାନ୍ତିରେ ଆକ୍ରାନ୍ତ ହୋଇଥିଲେ । ଏକ ଡାକ୍ତରୀଦଳ ଉକ୍ତ ଗ୍ରାମକୁ ଯାଇ ଘଟଣାର ତଦନ୍ତ କରିଥିଲେ । ମିଠା ବିଷାକ୍ତ ହୋଇଯାଇଥିବାରୁ ଏଭଳି ଘଟିଥାଇପାରେ ବୋଲି କୁହାଯାଉଛି । ଚିକିତ୍ସିତ ହେଉଥିବା ରୋଗୀ ମଧ୍ୟରେ ଦୁଇବର୍ଷର ଶିଶୁଙ୍କଠାରୁ ୮୦ ବର୍ଷର ବୃଦ୍ଧା ରହିଛନ୍ତି । ଏଭଳି ଘଟଣାକୁ ନେଇ ଗାଁରେ ଭୟଙ୍କର ମାହୋଲ ରହିଛି ।
Powered by Froala Editor
