କର୍ଣ୍ଣାଟକର ଉତ୍ତର କନ୍ନଡରେ ଜଣେ ୩୨ ବର୍ଷ ବୟସ୍କା ମହିଳା ତାଙ୍କ ୬ ବର୍ଷର ପୁଅକୁ କୁମ୍ଭୀର ମୁହଁକୁ ଫିଙ୍ଗି ଦେଇଛନ୍ତି । ପୁଲିସ୍‌ ଏହି ଘଟଣାର ପ୍ରାରମ୍ଭିକ ତଦନ୍ତ କରି ହତ୍ୟା ଅଭିଯୋଗରେ ମହିଳାଙ୍କୁ ଗିରଫ କରିିଛି। ଦୁଇ ଦିନ ଖୋଜାଖୋଜି କରିବା ପରେ ଶେଷରେ ହାତ ନଥିବା ମୃତ ଶରୀର ଉଦ୍ଧାର କରିଛି ପୁଲିସ। କୁମ୍ଭୀର କାମୁଡାରେ ଛୁଆଟିର ଅବସ୍ଥା ଏପରି ହୋଇଥାଇପାରେ ବୋଲି ପୁଲିସ ସନ୍ଦେହ କରୁଛି।

ପୁଲିସ କହିବା ଅନୁସାରେ, ମୃତ ପୁଅଟି ଜନ୍ମରୁ ମୂକ। ସେ କଥା କହିପାରୁନଥିବାରୁ ସ୍ୱାମୀ ରବି କୁମାର ଓ ସ୍ତ୍ରୀ ସାବିତ୍ରୀଙ୍କ ମଧ୍ୟରେ ସବୁବେଳେ ଝଗଡ଼ା ହେଉଥିଲା। ଏଥିପାଇଁ ରବି ସାବିତ୍ରୀଙ୍କୁ ଦାୟୀ କରି ଆସୁଥିଲେ। ସେ କାହିଁକି ମୂକ ପୁଅକୁ ଜନ୍ମ ଦେଲେ ବୋଲି ରବି ସାବିତ୍ରୀଙ୍କ ସହ ଝଗଡ଼ା କରୁଥିଲେ। ଶନିବାର ମଧ୍ୟ ସମାନ କଥାକୁ ନେଇ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଯୁକ୍ତିତର୍କ ପରେ ସାବିତ୍ରୀ ରାତି ପ୍ରାୟ ୯ଟା ସମୟରେ ପୁଅକୁ ଏକ କେନାଲରେ ଫିଙ୍ଗିଥିଲେ। ଏହି କେନାଲଟି କୁମ୍ଭୀର ରହୁଥିବା କାଳୀ ନଦୀକୁ ସଂଯୋଗ କରେ।

ଏନେଇ ପଡୋଶୀଙ୍କ ପକ୍ଷରୁ ଖବର ପାଇ ପୁଲିସ ଘଟଣାସ୍ଥଳରେ ପହଞ୍ଚି ଛୁଆଟିକୁ ଉଦ୍ଧାର କରିବା ପାଇଁ ବହୁ ଚେଷ୍ଟା କରିଥିଲା। ପୁଲିସ ଏବଂ ଅଗ୍ନିଶମ ବାହିନୀର ବହୁ ଉଦ୍ୟମ ସତ୍ତ୍ବେ ବି ଶନିବାର ରାତିରେ ବିନୋଦର ମୃତଦେହ ମିଳିପାରିନଥିଲା। ରବିବାର ସକାଳେ ସର୍ଚ୍ଚ ଟିମ୍ ଶିଶୁଟିର ମୃତଦେହକୁ ଉଦ୍ଧାର କରିଥିଲା। ଉଦ୍ଧାର ପରେ ଶିଶୁଟିର ଶରୀରରେ ଗଭୀର ଆଘାତ ଏବଂ କାମୁଡ଼ା ଚିହ୍ନ ଥିବା ଜଣାପଡିଛି। ଶରୀରରେ ଏକାଧିକ କ୍ଷତ ଚିହ୍ନ ସହ ଗୋଟେ ହାତ ନଥିବାରୁ କୁମ୍ଭୀର ଆକ୍ରମଣ କରିଥିବା ସନ୍ଦେହ କରାଯାଉଛି।

Powered by Froala Editor