ଗାଜିଆବାଦରେ ଏକ ମାରପିଟ ଘଟଣାକୁ ବିବାଦୀୟ କରି ସାମ୍ପ୍ରଦାୟିକ ରୂପ ଦେଉଥିବା ଅଭିଯୋଗରେ ଅଭିନେତ୍ରୀ ସ୍ୱରା ଭାସ୍କର ଏବଂ ଟ୍ୱିଟର ଇଣ୍ଡିଆ ମୂଖ୍ୟ ମନୀଷ ମାହେଶ୍ୱରୀଙ୍କ ବିରୋଧରେ ତିଳକମାର୍ଗ ପୋଲିସ ଷ୍ଟେସନରେ ଅଭିଯୋଗ କରାଯାଇଛି । ତେବେ କାହା ବିରୋଧରେ ଅଭିଯୋଗକୁ ଆଧାର କରି ଏଯାଏ ଏଫଆଇଆର ରୁଜୁ କରାଯାଇ ନାହିଁ। କିନ୍ତୁ ଦିଲ୍ଲୀ ପୁଲିସ୍‌ ଅଭିଯୋଗକୁ ଆଧାର କରି ତଦନ୍ତ ଆରମ୍ଭ କରିଛି। ଏହାପୂର୍ବରୁ ଗାଜିଆବାଦ ମାରପିଟ ଘଟଣାକୁ ନେଇ ଏଫଆଇଆର ରୁଜୁ କରାଯାଇଥିଲା। ଏଥିରେ ଟ୍ୱିଟର ଆଇଏନସି, ଟ୍ୱିଟର କମ୍ୟୁନିକେସନ୍ସ ଇଣ୍ଡିଆ, ନ୍ୟୁଜ ୱେବସାଇଟ ଦି ୱେର, ସାମ୍ବାଦିକ ମହମ୍ମଦ ଜୁବାଇର, ରାଣା ଆୟୁବ, କଂଗ୍ରେସ ନେତା ଶାମ ମହମ୍ମଦ, ସଲମନ ନିଜାମି, ମୁସକାରୀ ଉସମାନୀ ଓ ଲେଖକ ସବା ନକଭୀଙ୍କ ନାଁ ରହିଥିଲା। 

ସୂଚନାଯୋଗ୍ୟ, ଜଣେ ଯୁବକ ଗାଜିଆବାଦର ଲୋନୀରେ ଅବଦୁଲ ସମିଦ ମାଡ ମାରିବା ସହ ତାଙ୍କ ଦାଢ଼ୀ କାଟି ନେଇଥିବା ଅଭିଯୋଗ ହୋଇଥିଲା । ପୋଲିସ ଏଥିରେ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ କରି ନେଇଛି । ଏହା ସତ୍ୱେ ଉପରୋକ୍ତ ବ୍ୟକ୍ତିମାନେ ଏହାକୁ ସାମ୍ପ୍ରଦାୟିକ ରଙ୍ଗ ଦେବାକୁ ଉଦ୍ୟମ କରିଥିଲେ । ପୋଲିସ ଅନୁସାରେ ବୃଦ୍ଧ ଜଣଙ୍କ ଯୁବକକୁ କେତେକ ତାବିଜ ଦେଇଥିଲେ, ଯାହା କି କାର୍ଯ୍ୟ କରି ନ ଥିଲା । ଏହାକୁ ନେଇ ଯୁବକଜଣଙ୍କ ତାଙ୍କୁ ମାରପିଟ କରିଥିଲେ । ମଙ୍ଗଳବାର ରାତି ୧୧.୩୦ରେ ଜଣେ ସ୍ଥାନୀୟ ପୁଲିସ୍‌ଙ୍କ ଅଭିଯୋଗକ୍ରମେ ଗାଜିଆବାଦର ଲୋନୀ ପୁଲିସ୍‌ ଷ୍ଟେସନରେ ଏପରି ଏଫଆଇଆର ରୁଜୁ କରାଯାଇଛି। ଅନ୍ୟପକ୍ଷରେ ପ୍ରେସ କ୍ଲବ ଅଫ ଇଣ୍ଡିଆ ଏଫଆଇଆରରୁ ସାମ୍ବାଦିକମାନଙ୍କ ନାଁ ହଟାଇବାକୁ ଦାବି କରିଛନ୍ତି। 

Powered by Froala Editor