ଆଇସିୟୁରେ ଗୁରୁତର ରୋଗୀଙ୍କୁ ଦୁଷ୍କର୍ମ, ନର୍ସ ଗିରଫ
ଗୁରୁତର ରୋଗୀଙ୍କୁ ବି ଛାଡ଼ିନି ଜଣେ ନର୍ସିଂ କର୍ମଚାରୀ। ଫୁସଫୁସ ସଂକ୍ରମଣର ଚିକିତ୍ସା ପାଇଁ ଆଇସିୟୁରେ ରହିଥିବା ଜଣେ ୨୪ ବର୍ଷୀୟ ମହିଳାଙ୍କୁ ଇଞ୍ଜେକସନ ଦେଇ ଭୋର ୪ଟା ସମୟରେ ଦୁଷ୍କର୍ମ କରିଥିବା ଅଭିଯୋଗ ହୋଇଛି। ରାଜସ୍ଥାନର ଅଲୱର ଠାରେ ଥିବା ଗୋଟିଏ ଘରୋଇ ହସ୍ପିଟାଲରେ ଏପରି ଘଟଣା ଘଟିଛି। ଅଭିଯୋଗ କରାଯିବା ପରେ ଅଭିଯୁକ୍ତ ଚିରାଗ ଯାଦବଙ୍କୁ ଗିରଫ କରିଛି ପୁଲିସ।
ପୁଲିସ୍ କହିଛି ଯେ ଫୁସଫୁସ ସଂକ୍ରମଣ ଯୋଗୁ ମହିଳା ଜଣଙ୍କ ଉକ୍ତ ଘରୋଇ ହସ୍ପିଟାଲରେ ଭର୍ତ୍ତି ହୋଇଥିଲେ। ତାଙ୍କ ଅବସ୍ଥା ଗୁରୁତର ଥିବାରୁ ତାଙ୍କର ଚିକିତ୍ସା ଆଇସିୟୁରେ ଚାଲିଥିଲା। ହେଲେ ଆଇସିୟୁରେ ଡ୍ୟୁଟି କରୁଥିବା ଚିରାଗ ଯାଦବ ତାଙ୍କୁ ଭୋର ୪ଟାରେ ଦୁଷ୍କର୍ମ କରିଥିବା ଅଭିଯୋଗ ହୋଇଛି।
ଘଟଣା ଦିନ ଚିରାଗ ଯାଦବ ଭୋର ପ୍ରାୟ ୪ଟା ସମୟରେ ଦୁଷ୍କର୍ମ କରିଥିଲେ। ପୀଡ଼ିତା ଏହାର ବିରୋଧ କରିବାରୁ ସେ ତାଙ୍କୁ ନିଶା ଇଞ୍ଜେକ୍ସନ ଦେଇଥିଲେ। ଚେତା ଫେରିବା ପରେ ପୀଡ଼ିତା ନିଜ ସ୍ବାମୀଙ୍କୁ ଫୋନ କରି ପୂରା ଘଟଣା ବିଷୟରେ ଜଣାଇଥିଲେ। ଅଭିଯୋଗ ପାଇବା ପରେ ପୁଲିସ୍ ଅଭିଯୁକ୍ତକୁ ଅଟକ ରଖି ପଚରାଉଚରା କରୁଛି।
Powered by Froala Editor
