ଅଯୋଧ୍ୟା: ଅଲୌକିକ ଏବଂ ଐତିହାସିକ ମୁହୂର୍ତ୍ତ । ଶେଷ ହେଲା ରାମଲାଲାଙ୍କ ପ୍ରାଣ ପ୍ରତିଷ୍ଠା । ୫୦୦ ବର୍ଷର ଅପେକ୍ଷାର ଅନ୍ତଃ ଘଟିଲା । ଏତେ ବର୍ଷର ଅପେକ୍ଷା ମାତ୍ର ୮୪ ସେକେଣ୍ଡରେ ସଂପନ୍ନ ହେଲା । ସ୍ୱର୍ଣ୍ଣିମ ଅକ୍ଷରରେ ଲିପିବଦ୍ଧ ହେଲା ଆଜିର ଦିନ । ଯେଉଁ ସମୟକୁ ଅପେକ୍ଷା କରାଯାଇଥିଲା ସେହି ସମୟ ପହଞ୍ଚିଲା । ଭବ୍ୟ ଏବଂ ଦିବ୍ୟ ରାମ ମନ୍ଦିରରେ ବିରାଜମାନ କଲେ ପ୍ରଭୁ ଶ୍ରୀ ରାମଚନ୍ଦ୍ର । ମାହେନ୍ଦ୍ର ବେଳା ଓ ମାହାର୍ଘ୍ୟ ମୁହୂର୍ତ୍ତରେ ହେଲା ରାମଲାଲାଙ୍କ ପ୍ରାଣ ପ୍ରତିଷ୍ଠା ।  ଏହା ସହିତ ସମଗ୍ର ବିଶ୍ୱ ଏହି ଐତିହାସିକ ମୁହୂର୍ତ୍ତର ସାକ୍ଷୀ ପାଲଟିଛି । ରାମଲାଲାଙ୍କ ପ୍ରାଣ ପ୍ରତିଷ୍ଠା ପାଇଁ ୮୪ସେକେଣ୍ଡର ଶୁଭ ସମୟ ୧୨ଟା ୨ରୁ ଆରମ୍ଭ ହୋଇ ୧୨ଟା ୩୦ ମିନିଟ ୩୨ ସେକେଣ୍ଡ ପର୍ଯ୍ୟନ୍ତ ଥିଲା । ଏହି ସମୟରେ ଅଯୋଧ୍ୟା ରାମ ମନ୍ଦିରରେ ପ୍ରାଣ ପ୍ରତିଷ୍ଠା ନୀତି ସଂପନ୍ନ ପରେ ଦର୍ଶନ ଦେଲେ ପ୍ରଭୁ ଶ୍ରୀ ରାମଚନ୍ଦ୍ର । ହୀରା ଏବଂ ସୁନା ଅଳଙ୍କାର ପରିଧାନ କରିଛନ୍ତି ଶ୍ରୀ ରାମଲାଲା । ରାମଙ୍କ ମୁଖମଣ୍ଡଳକୁ ଦେଖି ବିଭୋର ଭକ୍ତ । କାଶୀ ପୀଠର ବେଦଜ୍ଞ ପ୍ରାଣ ପ୍ରତିଷ୍ଠା କାର୍ଯ୍ୟ ସଂପନ୍ନ କରିଛନ୍ତି । ଯଜମାନ ଭାବେ ଦାୟିତ୍ୱ ତୁଲାଇଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।

ସୋମବାର ୧୧ଟା ସମୟରେ ଅଯୋଧ୍ୟାରେ ପହଞ୍ଚିବା ପରେ ରାମ ମନ୍ଦିରକୁ ପ୍ରବେଶ କରିଥିଲେ ପ୍ରଧାନମନ୍ତ୍ରୀ । ହାତରେ ପୂଜା ସାମଗ୍ରୀ ଧରି ଗର୍ଭଗୃହରେ ପ୍ରବେଶ କରିଥିଲେ । ପରେ ପ୍ରାଣ ପ୍ରତିଷ୍ଠା ପୂଜାର୍ଚ୍ଚନାରେ ଯଜମାନ ଭାବେ ଦାୟିତ୍ୱ ତୁଲାଇଥିଲେ । ଏହି ସମୟରେ ଆର୍ଏସ୍ଏସ୍ ମୁଖ୍ୟ ମୋହନ ଭାଗବତ, ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଓ ରାଜ୍ୟପାଳ ଆନନ୍ଦି ବେନ ମଧ୍ୟ ଉପସ୍ଥିତ ଥିଲେ । ଶୁଭ ମୂହୁର୍ତ୍ତରେ ପ୍ରାଣ ପ୍ରତିଷ୍ଠା ହୋଇଥିଲା । ପ୍ରଧାନମନ୍ତ୍ରୀ ରାମଲାଲଙ୍କ ଆଖି ପଟି ଖୋଲିଥିଲେ । ପ୍ରାଣ ପ୍ରତିଷ୍ଠା ପରେ ପ୍ରଧାନମନ୍ତ୍ରୀ ପ୍ରଭୁ ରାମଚନ୍ଦ୍ରଙ୍କ ପାଦ ଛୁଇଁ ପ୍ରଣାମ କରିଥିଲେ । ପରେ ରମଚନ୍ଦ୍ରଙ୍କ ଚରଣରେ ପଦ୍ମ ଫୁଲ ରଖିବା ସହ ଜଳ ଅର୍ପଣ କରିଥିଲେ । ପ୍ରାଣ ପ୍ରତିଷ୍ଠା ଶେଷ ହେବା ପରେ ରାମଲାଲାଙ୍କ ଆଳତି ହୋଇଥିଲା । ପରେ ପରେ ରାମଙ୍କ ବିଗ୍ରହଙ୍କ ଚାରିପାଖରେ ବୁଲିବା ପରେ ପ୍ରଧାନମନ୍ତ୍ରୀ ଭୂମିରେ ଲୋଟି ପଡି ରାମଲାଲାଙ୍କୁ ସାଷ୍ଟାଙ୍ଗ ପ୍ରଣାମ କରିଥିଲେ । ଏହା ସହିତ ସମସ୍ତ ରୀତିନୀତି ସମାପ୍ତ ହୋଇଥିଲା । ପ୍ରାଣ ପ୍ରତିଷ୍ଠା ପୂର୍ବରୁ ହେଲିକପ୍ଟରରୁ ମନ୍ଦିର ଉପରେ ଫୁଲ ବର୍ଷା କରାଯାଇଥିଲା  । ୧୮ଟି ରାଜ୍ୟରୁ ଆସିଥିବା ବାଦ୍ୟଯନ୍ତ୍ର ମଧ୍ୟ ବଜାଯାଇଥିଲା ।
‘ପ୍ରାଣ ପ୍ରତିଷ୍ଠା’ ସମାରୋହ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିଜର ୧୧ ଦିନର ଉପବାସ ଭାଙ୍ଗିଥିଲେ । ଗୋବିନ୍ଦ ଦେବ ଗିରି ମହାରାଜ ତାଙ୍କୁ ‘ଚରଣାମୃତ’ (ରୀତିନୀତି ପାଇଁ ବ୍ୟବହୃତ କ୍ଷୀରରେ ତିଆରି ମିଠା ପାନୀୟ) ଖୁଆଇ ତାଙ୍କର ଉପବାସ ଭଙ୍ଗ କରାଇଥିଲେ ।  ମୋଦି ତାଙ୍କର ୧୧ ଦିନିଆ ଉପବାସକୁ ସଫଳତାର ସହ ସମାପ୍ତ କରିଥିବାରୁ ଗୋବିନ୍ଦ ଦେବ ଗିରି ମହାରାଜ ପ୍ରଧାନମନ୍ତ୍ରୀଙ୍କ ଭକ୍ତିକୁ ପ୍ରଶଂସା କରିଥିଲେ ।

ପରେ ପରେ ପ୍ରଧାନମନ୍ତ୍ରୀ ଦେଶବାସୀଙ୍କୁ ସମ୍ବୋଧନ କରିଥିଲେ । ସିୟାବର ରାମଚନ୍ଦ୍ର କି ଜୟରୁ ଭାଷଣ ଆରମ୍ଭ କରି ମୋଦି କହିଥିଲେ ଯେ ଆଜି ଆମର ରାମ ଆସିଗଲେ । ଆମ ରାମଲାଲା ଆଉ ଟେଣ୍ଟରେ ରହିବେ ନାହିଁ, ରାମଲାଲା ଏଣିକି ଦିବ୍ୟ ମନ୍ଦିରରେ ରହିବେ । ଏହି ମୁହୂର୍ତ୍ତ ଅତ୍ୟନ୍ତ ଅଲୌକିକ ଓ ପବିତ୍ର । ଶହ ଶହ ବର୍ଷର ଅପେକ୍ଷା ପରେ ଆମର ରାମ ଆସିଛନ୍ତି । ବଳିଦାନ ଏବଂ ଅନୁତାପ ପରେ ଆମର ରାମ ଆଯୋଧ୍ୟାରେ ପହଞ୍ଚିଛନ୍ତି । ୨୨ ଜାନୁଆରୀ ୨୦୨୪ର ଏହି ସୂର୍ଯ୍ୟ ଏକ ନୂତନ କିରଣ ଆଣିଛି । ଏହାଛଡ଼ା ପ୍ରଧାନମନ୍ତ୍ରୀ କହିଥିଲେ ଯେ ଆଜି ମୁଁ ମଧ୍ୟ ପ୍ରଭୁ ଶ୍ରୀ ରାମଙ୍କୁ କ୍ଷମା ମାଗୁଛି । ଆମର ପ୍ରୟାସ, ବଳିଦାନ ଏବଂ ଅନୁତାପରେ କିଛି ଅଭାବ ରହିଯାଇଥିଲା ଯାହା ଏତେ ଶତାବ୍ଦୀ ଧରି ଆମେ କରି ପାରିଲୁ ନାହିଁ । ଆଜି ଏହି କାର୍ଯ୍ୟ ସମାପ୍ତ ହୋଇଛି । ମୋର ବିଶ୍ୱାସ ଯେ ଭଗବାନ ଶ୍ରୀ ରାମ ଆଜି ନିଶ୍ଚିତ ଭାବରେ ଆମକୁ କ୍ଷମା କରିବେ ବୋଲି ମୋଦି କହିଥିଲେ । 

Powered by Froala Editor