ଅଭିନେତା ଜୁନିଅର ମେହମୁଦ ଏବେ ମୃତ୍ୟୁ ସହ ଲଢ଼ୁଛନ୍ତି। ତାଙ୍କ ପ୍ରକୃତ ନାଁ ନଇମ ସୟିଦ। ତେବେ ଜୁନିଅର ମେହମୁଦ ନାଁରେ ସେ ପ୍ରସିଦ୍ଧ। ତାଙ୍କୁ ଏହି ନାଁ ଦେଇଥିଲେ ବଲିଉଡ୍‌ର ବିଗତ ଦିନର ପ୍ରସିଦ୍ଧ ଅଭିନେତା ମହମୁଦ ଅଲୀ।

ତାଙ୍କର କର୍କଟ ରୋଗ ହୋଇଥିବା ବେଳେ ସେ କର୍କଟ ରୋଗର ଚତୁର୍ଥ ପର୍ଯ୍ୟାୟରେ ପହଞ୍ଚିସାରିଥିବା ଜଣାପଡ଼ିଛି। ସୂଚନା ମିଳିଛି ଯେ, ଜୁନିଅର ମେହମୁଦ ଗତ ଦୁଇ ମାସ ଧରି ଅସୁସ୍ଥ ଥିବା ସହ ହଠାତ୍ ତାଙ୍କର ଓଜନ ହ୍ରାସ ହେବାକୁ ଲାଗିଥିଲା। ଏହା ପରେ ତାଙ୍କର ପରୀକ୍ଷା କରାଯିବାରୁ ସେ କର୍କଟ ରୋଗରେ ପୀଡ଼ିତ ଥିବା ଜଣାପଡ଼ିଥିଲା। ନଭେମ୍ବରରେ ତାଙ୍କର ରୋଗ ଚିହ୍ନଟ ହୋଇଥିବା ଜଣାପଡ଼ିଛି। ଏହି ସୂଚନା ତାଙ୍କର ଘନିଷ୍ଠ ବନ୍ଧୁ ସଲାମ କାଜି ଦେଇଛନ୍ତି।

ସଲାମ କାଜି କହିଛନ୍ତି, ସେ (ଜୁନିୟର ମହମୁଦ) 2 ମାସ ଧରି ଅସୁସ୍ଥ ଥିଲେ। ସେତେବେଳେ ସମସ୍ତେ ଭାବିଥିଲେ କିଛି ଛୋଟ ସମସ୍ୟା ହୋଇଥିବ। କିନ୍ତୁ ହଠାତ୍ ତାଙ୍କ ଓଜନ ହ୍ରାସ ପାଇବାକୁ ଲାଗିଲା। ଏହା ପରେ ପରୀକ୍ଷା କରିବାରୁ ତାଙ୍କୁ କ୍ୟାନସର ହୋଇଥିବା ଜଣାପଡ଼ିଲା। ତାଙ୍କ ଲିଭର, ଫୁସଫୁସ ସହିତ ପୂରା ଶରୀରକୁ କ୍ୟାନସର ବ୍ୟାପୀ ସାରିଛି। ତାଙ୍କ ପେଟରେ ଏକ ଟ୍ୟୁମର ହୋଇଛି। ସେ ଜଣ୍ଡିସରେ ବି ପୀଡ଼ିତ ଅଛନ୍ତି। ସେ ଏବେ କ୍ୟାନସରର ଚତୁର୍ଥ ସ୍ତରରେ ଅଛନ୍ତି।

ସଲାମ କାଜି କହିଛନ୍ତି ଜୁନିଅର ମେହମୁଦଙ୍କୁ ସାହାଯ୍ୟ କରିବା ପାଇଁ ଜନି ଲିଭର ଯାଇଥିଲେ। ତେବେ ଜୁନିଅର ମେହମୁଦଙ୍କ ଆର୍ଥିକ ଅବସ୍ଥା ବେଶ୍ ସ୍ବଚ୍ଛଳ। ମେହମୁଦଙ୍କ ପିଲାମାନେ ତାଙ୍କୁ କହିଥିଲେ ଯେ ଟଙ୍କାପଇସା ନେଇ ସେମାନଙ୍କର କିଛି ଚିନ୍ତା ନାହିଁ। ତଥାପି ଆବଶ୍ୟକ ହେଲେ ତାଙ୍କୁ ଫୋନ କରିବାକୁ ଜନି ଲିଭର ସେମାନଙ୍କୁ କହିଛନ୍ତି।

Powered by Froala Editor