ମୁମ୍ବାଇ: ପୁଣି ବିବାଦରେ ନାଗୀନ୍‌-୩ ଫେମ୍ ଅଭିନେତା ପର୍ଲ ଭି ପୁରୀ । ତାଙ୍କ ନାମରେ ଆସିଛି ବଳାତ୍କାର ଭଳି ସଙ୍ଗୀନ ଅଭିଯୋଗ । ପୁଲିସ୍ ତାଙ୍କୁ ମୁମ୍ବାଇ ମଲାଡସ୍ଥିତ ମଲୱାନୀରୁ ଗିରଫ କରିଛି । ତାଙ୍କ ସହିତ ଆଉ ୫ ଜଣଙ୍କୁ ମଧ୍ୟ ବନ୍ଧା ଯାଇଛି । ସମସ୍ତ ଅଭିଯୁକ୍ତଙ୍କ ବିରୋଧରେ ପୀଡ଼ିତା ଅଭିଯୋଗ କରିଥିଲେ । ପୁଲିସ୍ ପୀଡ଼ିତାଙ୍କ ବୟାନ ରେକର୍ଡ କରିବା ସହିତ ଅଭିଯୋଗକୁ ଭିତ୍ତିକରି ଗିରଫ କରିଥିବା ଜଣାପଡ଼ିଛି । ଏହାପରେ ଏବେ ବଲିଉଡରେ ଚର୍ଚ୍ଚା ଜୋର୍ ଧରିଛି । ସେପଟେ ପର୍ଲ ଭି ପୁରୀଙ୍କୁ ନେଇ ପ୍ରଯୋଜକମାନେ ଚିନ୍ତାରେ ପଡ଼ିଛନ୍ତି । କାରଣ ତାଙ୍କୁ ନେଇ ଆଗାମୀ ଦିନରେ କିଛି ପ୍ରୋଜେକ୍ଟ କରିବାକୁ ସେମାନେ ଯୋଜନା କରିଥିବା କୁହାଯାଉଛି ।

ପର୍ଲ ଭି ପୁରୀଙ୍କ ନାମରେ ଏହା ପ୍ରଥମ ଅଭିଯୋଗ ନୁହେଁ । କିଛି ଦିନ ତଳେ ତାଙ୍କୁ ନେଇ ଇଣ୍ଡଷ୍ଟ୍ରି ବେଶ୍ ସରଗରମ ହୋଇଥିଲା । ସେ ଟେଲି ଅଭିନେତ୍ରୀ କରିଶ୍ମା ତନ୍ନାଙ୍କ ସହ ଦୀର୍ଘ ଦିନ ଧରି ରିଲେସନସିପରେ ରହିଥିଲେ । ଏହାପରେ ଉଭୟଙ୍କ ମଧ୍ୟରେ କୌଣସି କାରଣକୁ ନେଇ ମତାନ୍ତର ହୋଇଥିଲା । ପରେ ସେମାନେ ଅଲଗା ହୋଇଯାଇଥିଲେ । ଏହି ଘଟଣାକୁ ନେଇ ସେତେବେଳେ ଖୁବ୍ ଚର୍ଚ୍ଚା ହୋଇଥିଲା । ଏବେ ପୁଣି ଏକ ନୂଆ ବିବାଦରେ ଛନ୍ଦି ହେବା ପରେ ତାଙ୍କ ଉପରେ କିଛି ପ୍ରଯୋଜନା ସଂସ୍ଥା ଆସ୍ଥା ତୁଟାଇ ସାରିଥିବା ବିଭିନ୍ନ ଗଣମାଧ୍ୟମରେ ଆଲୋଚନା କରାଯାଉଛି । 

ସୂଚନାଯୋଗ୍ୟ, ପର୍ଲ ଭି ପୁରୀ ନାଗୀନ୍‌-୩ ବ୍ୟତୀତ ଅନେକଗୁଡ଼ିକ ଟିଭି ପ୍ରୋଜେକ୍ଟରେ କାମ କରି ସାରିଛନ୍ତି । ଏହା ତାଙ୍କୁ ଖୁବ୍ ଲୋକପ୍ରିୟ କରିଛି ମଧ୍ୟ । ସେ ଗୁଡ଼ିକ ମଧ୍ୟରୁ ଖୁବସୁରତ, ଫିର୍ ଭି ମାନା ବଦତମିଜ୍ ଦିଲ୍‌, ମେରି ଶାଶୁ ମା’, ନାଗାର୍ଜୁନ ଏକ ଯୋଦ୍ଧା, ବେପନାହା ପ୍ୟାର ଭଳି ଅନେକ ଭଲ ପ୍ରୋଜେକ୍ଟରେ କାମ କରି ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛନ୍ତି । ତାଙ୍କର ଅନେକ ଫ୍ୟାନ୍ ଅଛନ୍ତି ।  ବଳାତ୍କାର ଘଟଣାରେ ଗିରଫ ହେବା ପରେ ଏବେ ସୋସିଆଲ୍ ମିଡିଆରେ ଫ୍ୟାନମାନେ ବହୁତ ଖରାପ କମେଣ୍ଟ କରୁଥିବା ଦେଖିବାକୁ ମିଳୁଛି ।

Powered by Froala Editor