କରୋନାରେ ୫୯୪ ଡାକ୍ତର ମୃତ, ଓଡ଼ିଶାରୁ ୨୨
ନୂଆଦିଲ୍ଲୀ : କରୋନା ମହାମାରୀର ଦ୍ୱିତୀୟ ଲହରରେ ଡାକ୍ତରମାନେ ବହୁସଂଖ୍ୟାରେ ସଂକ୍ରମିତ ହେବା ସହିତ ସାରାଦେଶରେ ୫୯୪ ଜଣ ଡାକ୍ତର ଜୀବନ ହରାଇଛନ୍ତି । ଏହି ସୂଚନା ଇଣ୍ଡିଆନ ମେଡିକାଲ ଆସୋସିଏସନ (ଆଇଏମଏ) ପକ୍ଷରୁ ଦିଆଯାଇଛି । କରୋନାରେ ପ୍ରାଣ ହରାଇଥିବା ୫୯୪ ଜଣ ଡାକ୍ତରଙ୍କ ମଧ୍ୟରୁ ଓଡିଶାର ୨୨ ଜଣ ସାମିଲ ଥିବାର ଆଇଏମଏ ସୂଚିତ କରିଛି । କରୋନା ମୁକାବିଲାରେ ଡାକ୍ତରମାନେ ଦିନରାତି ଲାଗିଥିବାବେଳେ ନିଜେ ବି ଏଥିରେ ସଂକ୍ରମିତ ହୋଇ ପ୍ରାଣ ହରାଉଛନ୍ତି । ଯାହାକୁ ନେଇ ଆଇଏମଏ ପକ୍ଷରୁ ଗଭୀର ଉଦବେଗ ପ୍ରକାଶ କରାଯାଇଛି ।
ଆଇଏମଏର ତଥ୍ୟ ଅନୁସାରେ, କରୋନାର ପ୍ରଥମ ଲହର ଦେଶର ୭୪୭ ଜଣ ଡାକ୍ତରଙ୍କ ଜୀବନ ନେଇଥିଲା ଏବଂ ଏଥିରେ ଓଡିଶାର ଡାକ୍ତରମାନଙ୍କ ସଂଖ୍ୟା ଥିଲା ୧୪ । କରୋନାର ପ୍ରଥମ ଓ ଦ୍ୱିତୀୟ ଲହରରେ ଓଡିଶାର ମୋଟ ୩୬ ଜଣ ଡାକ୍ତରଙ୍କ ସମେତ ଦେଶରେ ସମୁଦାୟ ୧୩୦୦ ଡାକ୍ତରଙ୍କ ମୃତ୍ୟୁ ହୋଇଥିବାର ଇଣ୍ଡିଆନ ମେଡିକାଲ ଆସୋସିଏସନ ପକ୍ଷରୁ କୁହାଯାଇଛି । ଆଇଏମଏର ସୂଚନା ଅନୁସାରେ କରୋନାର ଦ୍ୱିତୀୟ ଲହରରେ ଜାତୀୟ ରାଜଧାନୀ ଦିଲ୍ଲୀରେ ସର୍ବାଧିକ ୧୦୭ ଜଣ ଡାକ୍ତର ପ୍ରାଣ ହରାଇଛନ୍ତି ।
Powered by Froala Editor
