ଅନୁଶାସନ ନାମରେ ଜଣେ ଶିକ୍ଷକ ୩୦ ଜଣ ପିଲାଙ୍କ କେଶ କାଟିଛନ୍ତି। ଆସାମର ମାଜୁଲି ଜିଲାରେ ଏପରି ଘଟଣା ଘଟିଛି । ଏହାକୁ ଅଭିଭାବକ ଅପମାନଜନକ କହିବା ସହ ନିନ୍ଦା କରିଛନ୍ତି । ଜିଲାର ଡେପୁଟି କମିଶନର ଏ ସମ୍ପର୍କରେ ତଦନ୍ତ ନିର୍ଦ୍ଦେଶ ଦେଇଛନ୍ତି। ସେ କହିଛନ୍ତି, ପ୍ରାଥମିକ ଅନୁସନ୍ଧାନ ଅନୁଯାୟୀ ଶିକ୍ଷକ କେବଳ ଲମ୍ବା କେଶ କାଟି ଏହାକୁ ଛୋଟ କରିଛନ୍ତି। ସମ୍ପୂର୍ଣ୍ଣ ଭାବେ କାଟିନାହାନ୍ତି। ସମ୍ପୂର୍ଣ୍ଣ କେଶ କଟାଯାଇଥିବା ରିପୋର୍ଟ ମିଥ୍ୟା।

ତେବେ ଘଟଣା ପରେ ପିଲାମାନେ କ୍ଲାସରେ ଯୋଗଦେବାକୁ ମନା କରୁଛନ୍ତି। ଜଣେ ଛାତ୍ରଙ୍କର ଅଭିଭାବକ କହିଥିଲେ ସେମାନଙ୍କ ପିଲାମାନେ କାନ୍ଦି କାନ୍ଦି ଘରକୁ ଆସିଥିଲେ ଏବଂ ବର୍ତ୍ତମାନ ସେମାନେ ସ୍କୁଲ ଯିବାକୁ ମନା କରୁଛନ୍ତି। ଅଭିଭାବକମାନେ କହିଛନ୍ତି ବିଦ୍ୟାଳୟ ଶୃଙ୍ଖଳାକୁ କାର୍ଯ୍ୟକାରୀ କରିବା ଆବଶ୍ୟକ। କିନ୍ତୁ ଅନୁଶାସନ ନାମରେ ପୁରା ବିଦ୍ୟାଳୟ ସାମ୍ନାରେ କେଶ କାଟିବା ଅପମାନଜନକ ।

ବିଦ୍ୟାଳୟ କର୍ତ୍ତୃପକ୍ଷ ସେମାନଙ୍କ ସ୍ପଷ୍ଟୀକରଣରେ କହିଛନ୍ତି ପିଲାମାନେ ସେମାନଙ୍କର କେଶକୁ ଲମ୍ବା ରଖିଛନ୍ତି, ଯାହା ବିଦ୍ୟାଳୟର ନିର୍ଦ୍ଦେଶାବଳୀ ଅନୁଯାୟୀ ବର୍ଜନୀୟ। ସେମାନଙ୍କୁ ଅନେକ ଥର ଚେତାବନୀ ଦିଆଯାଇଥିଲା ଏବଂ ପିତାମାତାଙ୍କୁ ମଧ୍ୟ ସୂଚନା ଦିଆଯାଇଥିଲା କିନ୍ତୁ କିଛି ପଦକ୍ଷେପ ଗ୍ରହଣ କରାଯାଇ ନ ଥିଲା। ସେମାନେ ଲମ୍ବା କେଶ ରଖିଥିବାରୁ ଶିକ୍ଷା ପାଇଁ ଏଭଳି କରାଯାଇଥିଲା।

Powered by Froala Editor