ଡାକ ବିଭାଗରେ ଚାକିରି ପାଇଁ ଆଶାୟୀ ଦେଇଛନ୍ତି ନକଲି ସାର୍ଟିଫିକେଟ୍, ୬ଜଣଙ୍କ ନାଁରେ ଏତଲା
ସମ୍ବଲପୁର : ସମ୍ବଲପୁର ଯାଏଁ ଲମ୍ବିଛି ଜାଲ୍ ସାର୍ଟିଫିକେଟ୍ ଚେର । ଡାକ ବିଭାଗରେ ଚାକିରି ପାଇଁ ଆଶାୟୀ ଦେଇଛନ୍ତି ନକଲି ଦସ୍ତାବିଜ୍ । ୬ ଜଣ ଆଶାୟୀଙ୍କ ସାର୍ଟିଫିକେଟ୍ ନକଲି ହୋଇଥିବା ସନ୍ଦେହ କରିଛି ଡାକ ବିଭାଗ । ଏନେଇ ସମ୍ବଲପୁର ଟାଉନ୍ ଥାନାରେ ଡାକ ବିଭାଗ ପକ୍ଷରୁ ଏତଲା ଦିଆଯାଇଛି । ଡାକ ବିଭାଗ ପଦବୀ ପାଇଁ ଆବେଦନ କରିଥିବା ୬ ଜଣ ଆଶାୟୀଙ୍କ ସାର୍ଟିଫିକେଟ୍ ଉତରପ୍ରଦେଶ ବୋର୍ଡର । ଯେଉଁଥିରେ ଓଡ଼ିଆର କୌଣସି ବିଷୟ ନାହିଁ । ହେଲେ ଏମାନେ ଓଡ଼ିଆ ବିଷୟ ରଖି ବୋର୍ଡ ପରୀକ୍ଷାରେ ପାସ୍ କରିଥିବା ସାର୍ଟିଫିକେଟରେ ଲେଖଯାଇଛି ।
ଏହି ସବୁ ସାର୍ଟିଫିକେଟ୍ ଅନଲାଇନରେ ଉପଲବ୍ଧ ନାହିଁ । ଡିଜି ଲକରରେ ମଧ୍ୟ ଏହାର କୌଣସି ତଥ୍ୟ ନାହିଁ । ଏହାକୁ ନେଇ ସନ୍ଦେହ ବଢିଥିବା ଡାକ ବିଭାଗ ପକ୍ଷରୁ କୁହାଯାଇଛି । ଏହାର ଯାଂଚ କରିବାକୁ ଥାନାରେ ଏତଲା ଦିଆଯାଇଛି । ଏହା ପରେ ଉତରପ୍ରଦେଶ ବୋର୍ଡକୁ ତଥ୍ୟ ମାଗିଛି ପୋଲିସ । ଆଜି ତଥ୍ୟ ଆସିବା ପରେ ଉଚ୍ଚଅଧିକାୀଙ୍କ ସହ ଆଲୋଚନା କରାଯିବ । ଅଭିଯୋଗ ହୋଇଥିବା ୬ ଜଣଙ୍କ ଘର ଭଦ୍ରକ, ଜଗତସିଂହପୁର, ବରଗଡ଼, ଦେବଗଡ଼ ଓ କଳାହାଣ୍ଡି ଜିଲ୍ଲାରେ । ଏମାନେ ଗୋଟିଏ ସ୍ଥାନରୁ ସାର୍ଟିଫିକେଟ୍ ଆଣିଛନ୍ତି ନାଁ ଅଲଗା ଅଲଗା ସ୍ଥାନରୁ ଆଣିଛନ୍ତି ତାକୁ ନେଇ ମଧ୍ୟ ସନ୍ଦେହ ସୃଷ୍ଟି ହୋଇଛି ।
Powered by Froala Editor
