ଯୋଶୀମଠ ଓ ଏହାର ଆଖପାଖ ଅଞ୍ଚଳର ଭୂମି ପ୍ରତି ବର୍ଷ ୬.୫ ସେଣ୍ଟିମିଟର ବା ୨.୫ ଇଞ୍ଚ ଦବୁଥିବା ବିଶେଷଜ୍ଞମାନେ କହିଛନ୍ତି। ଇଣ୍ଡିଆନ୍‌ ଇନ୍‌ଷ୍ଟିଚ୍ୟୁଟ୍‌ ଫର୍‌ ରିମୋଟ ସେନ୍ସିଂ ପକ୍ଷରୁ ହୋଇଥିବା ୨ ବର୍ଷର ଅଧ୍ୟୟନରୁ ଏହା ଜଣାପଡ଼ିଛି। ଡେରାଡୁନ୍‌ର ଏହି ସଂସ୍ଥା ଯୋଶୀମଠ ଓ ଏହାର ଚତୁଃପାର୍ଶ୍ୱରେ ଥିବା ଅଞ୍ଚଳର ସାଟେଲାଇଟ୍‌ ତଥ୍ୟକୁ ବ୍ୟବହାର କରିଥିଲା।

ସେଠାରେ ଅନେକ ଟେକ୍ଟୋନିକ୍‌ ପ୍ରକ୍ରିୟା ଚାଲିଥିବାରୁ ଅତି ସମ୍ବେଦନଶୀଳ ଅଞ୍ଚଳ ବୋଲି ଏଥିରୁ ଜଣାପଡ଼ିଥିଲା। ମାଟି ଦବିବା ଫଳରେ ଯୋଶୀମଠ ସହରର ଘରଗୁଡ଼ିକରେ ଫାଟ ସୃଷ୍ଟି ହେବା ସହ ରାସ୍ତା ଫାଟି ଆଁ କରିଛି। ଏହାକୁ ନେଇ ଲୋକେ ଆତଙ୍କିତ ଥିବାବେଳେ ୧୧୦ରୁ ଊର୍ଦ୍ଧ୍ୱ ପରିବାର ଘରଦ୍ୱାର ଛାଡ଼ି ପଳାଇଲେଣି।

ଅନ୍ୟପଟେ ଯୋଶୀମଠ ସହରରେ ଥିବା ବିପଦସଙ୍କୁଳ ହୋଟେଲ ଓ ଘରଗୁଡ଼ିକ ସପ୍ତାହକ ମଧ୍ୟରେ ଭଙ୍ଗାଯିବ ବୋଲି ବରିଷ୍ଠ ଅଧିକାରୀ ହିମାଂଶୁ ଖୁରାନା ସୂଚନା ଦେଇଛନ୍ତି। ବର୍ତ୍ତମାନ ସୁଦ୍ଧା ଯୋଶୀମଠରେ ଥିବା ଦୁଇଟି ହୋଟେଲ ଓ ଆଉ କିଛି ଘରକୁ ଭାଙ୍ଗିବା ପାଇଁ ନିଷ୍ପତ୍ତି ହୋଇଛି। ତେବେ ବିନା ନୋଟିସ ଓ କ୍ଷତିପୂରଣ ଘୋଷଣା ନ କରି ସରକାର ଉଚ୍ଛେଦ କରିବାକୁ ଯାଉଥିବାରୁ ଏହାକୁ ସ୍ଥାନୀୟ ଲୋକ ଗତକାଲି ଠାରୁ ବିରୋଧ କରୁଛନ୍ତି। ବିରୋଧ ବଢ଼ୁଥିବାରୁ ପ୍ରଶାସନିକ ଅଧିକାରୀମାନେ ସ୍ଥାନୀୟ ଲୋକ ଓ ଭଙ୍ଗା ଯିବାକୁ ଥିବା ୨ ହୋଟେଲର ମାଲିକଙ୍କୁ ଭେଟିଥିଲେ। ସେମାନଙ୍କ ସହ ଆଲୋଚନା କରିବା ପରେ ଶ୍ରୀ ଖୁରାନା ଏପରି ସୂଚନା ଦେଇଛନ୍ତି।

ସେ କହିଛନ୍ତି, ଆମେ ହୋଟେଲକୁ ମାଟିରୁ ମିଶାଇବୁ ନାହିଁ। ଆମେ କେବଳ କିଛି ଅଂଶକୁ ଭାଙ୍ଗିବୁ। ହୋଟେଲ ମାଲିକଙ୍କ ସହ ଆମର ସକାରାତ୍ମକ ଆଲୋଚନା ହୋଇଛି। ତେଣୁ ସବୁ କିଛି ଗୋଟିଏ ସପ୍ତାହ ମଧ୍ୟରେ ଶେଷ ହେବ।

Powered by Froala Editor