ଜୟପୁର: ରାଜସ୍ଥାନ ସରକାର ଦାରିଦ୍ର୍ୟ ସୀମା ରେଖା ତଳେ ଥିବା ଲୋକମାନଙ୍କୁ ୫୦୦ଟଙ୍କାରେ ରନ୍ଧନ ଗ୍ୟାସ ସିଲିଣ୍ଡର ଯୋଗାଇଦେବେ । ଆସନ୍ତା ବର୍ଷ ରାଜ୍ୟରେ ବିଧାନସଭା ନିର୍ବାଚନ ହେବାକୁ ଥିବାବେଳେ ମୁଖ୍ୟମନ୍ତ୍ରୀ ଅଶେକ ଗେହଲଟ ଏ ଘୋଷଣା କରିଛନ୍ତି । ଘୋଷଣା ବେଳେ କଂଗ୍ରେସ ଅଧ୍ୟକ୍ଷ ମଲିକାର୍ଜୁନ ଖଡ଼ଗେ ଓ ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ଉପସ୍ଥିତ ଥିଲେ ।

ଭାରତଯୋଡ଼ ଯାତ୍ରା ଅବସରରେ ଅଲୱାର ଠାରେ ଆୟୋଜିତ କାର୍ଯ୍ୟକ୍ରମରେ ଗେହଲଟ କହିଛନ୍ତି, ବର୍ତ୍ତମାନ ସେ ରାଜ୍ୟର ବଜେଟ ପ୍ରସ୍ତୁତିରେ ଲାଗିଛନ୍ତି । କିନ୍ତୁ ରାଜ୍ୟବାସୀଙ୍କୁ ସେ ଗୋଟିଏ କଥା କହିବାକୁ ଚାହାନ୍ତି । ଉଜ୍ଜ୍ୱଳା ଯୋଜନାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗରିବ ଲୋକଙ୍କୁ ଗ୍ୟାସ୍ ସଂଯୋଗ ଦେଲେ । କିନ୍ତୁ ସିଲିଣ୍ଡର ଦାମ ୪୦୦ଟଙ୍କାରୁ ବଢ଼ି ବର୍ତ୍ତମାନ ୧୦୫୦ ଟଙ୍କାରେ ପହଞ୍ଚିଲାଣି । ଫଳରେ ଅନେକ ମଧ୍ୟବିତ ଓ ଗରିବ ଶ୍ରେଣୀର ଲୋକେ ସିଲିଣ୍ଡର କିଣି ପାରୁନାହାନ୍ତି । ଯାହାଫଳରେ ଏହି ସିଲିଣ୍ଡରଗୁଡ଼ିକ ସେମାନଙ୍କ ଘରେ ଖାଲି ପଡ଼ିଛି । ଯେଉଁମାନେ ଗରିବ ଓ ଉଜ୍ଜ୍ୱଳା ଯୋଜନାରେ ସାମିଲ ହୋଇଛନ୍ତି ସେମାନଙ୍କୁ ଚିହ୍ନଟ କରାଯିବ ।

ଆସନ୍ତା ବର୍ଷ ଏପ୍ରିଲ ପହିଲାରୁ ସେମାନଙ୍କୁ ୫୦୦ଟଙ୍କା ଲେଖାଁରେ ବାର୍ଷିକ ୧୨ଟି ସିଲିଣ୍ଡର ଦିଆଯିବ । ଦରଦାମ ବୃଦ୍ଧିର ପ୍ରଭାବ ଗରୀବ ଲୋକଙ୍କ ଉପରେ ପଡ଼ୁଥିବାରୁ ତାକୁ ଲାଘବ କରିବା ଲାଗି ତାଙ୍କ ସରକାର ଏଭଳି ଯୋଜନାେ କାର୍ଯ୍ୟକାରୀ କରିବାକୁ ନିଷ୍ପତ୍ତି ନେଇଛନ୍ତି । 

Powered by Froala Editor