ନୂଆଦିଲ୍ଲୀ:   ୨୦୨୪ ସାଧାରଣ ନିର୍ବାଚନରେ ଥାର୍ଡ ଫ୍ରଣ୍ଟ ହୋଇ ନୁହେଁ ବରଂ ମେନ୍ ଫ୍ରଟ ହୋଇ ବିଜେପିକୁ ମୁକାବିଲା କରାଯିବ । ଜେଡିୟୁ ଜାତୀୟ ପରିଷଦ ବୈଠକରେ ଏହା କହିଛନ୍ତି ବିହାର ମୁଖ୍ୟମନ୍ତ୍ରୀ ନୀତିଶ କୁମାର । ଯଦି ଅଧିକରୁ ଅଧିକ ଦଳ ଏଥିପାଇଁ ଏକଜୁଟ ହୁଅନ୍ତି, ତେବେ ୨୦୨୪ରେ ମେନ୍ ପ୍ରଂଟ ବହୁ ସଂଖ୍ୟାରେ ବିଜୟୀ ହେବ ବୋଲି ନୀତିଶ ଦମ୍ଭୋକ୍ତି ପ୍ରକାଶ କରିଛନ୍ତି । ଜେଡିୟୁ ଜାତୀୟ ପରିଷଦ ବୈଠକରେ କାହାର ନା ନନେଇ ନୀତିଶ କୁମାର କେନ୍ଦ୍ରରେ ବିଜେପି ସରକାରଙ୍କୁ ଟାର୍ଗେଟ କରିଥିଲେ । ଗୁରୁତ୍ୱପୂର୍ଣ୍ଣ କଥା ହେଲା ଜେଡିୟୁ ଦଳର ବରିଷ୍ଠ ନେତା କେ.ସି ତ୍ୟାଗୀ ବିଜେଡି ସୁପ୍ରିମୋ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ନୀତିଶଙ୍କ ନେତୃତ୍ୱାଧୀନ ମେଂଟରେ ସାମିଲ ହେବାକୁ ଆହ୍ୱାନ କରିଥିଲେ । ନବୀନ ସମଦୂରତା ଆଭିମୁଖ୍ୟକୁ ଛାଡି ଜନତା ପରିବାରରେ ସାମିଲ ହେବା ଦରକାର ବୋଲି କହିଥିଲେ ।

ଯେତେବେଳେ ରାଜ୍ୟରେ ବିଜେଡି-ବିଜେପି ଟକରା ଟକରି ଚାଲିଛି ସେତେବେଳେ ନବୀନଙ୍କ ଆଭିମୁଖ୍ୟ ଉପରେ ସାରା ଦେଶର ବଡ ବଡ ନେତାଙ୍କ ନଜର ରହିଛି । ପୂର୍ବରୁ ବିଜେପି ବିରୋଧୀ ମେଂଟରେ ସାମିଲ ହେବାକୁ ନବୀନଙ୍କୁ ତେଲେଙ୍ଗାନା ମୁଖ୍ୟମନ୍ତ୍ରୀ, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ନିବେଦନ କରିସାରିଛନ୍ତି । ହେଲେ ନବୀନ ସମଦୂରତା ନୀତିକୁ ଆପଣାଇଛନ୍ତି । ନୀତିଶ କୁମାର କହିଛନ୍ତି ଯେ ଦେଶର ଉନ୍ନତି ବିଷୟରେ କେନ୍ଦ୍ର ସରକାର ଅନେକ କଥା କହୁଛନ୍ତି, କିନ୍ତୁ ଗରିବ ରାଜ୍ୟଗୁଡ଼ିକର ଉନ୍ନତି ପାଇଁ ତାଙ୍କ ସରକାର ଚିନ୍ତିତ ନୁହେଁ  । ଯଦି ବିହାର ସମେତ ଅନ୍ୟ ଗରିବ ରାଜ୍ୟଗୁଡିକ ସ୍ୱତନ୍ତ୍ର ରାଜ୍ୟ ମାନ୍ୟତା ପାଇଥାନ୍ତେ, ତେବେ ସ୍ଥିତି ଭଲ ହୋଇଥାନ୍ତା । ତେବେ ଆଗାମୀ ଦିନରେ କେନ୍ଦ୍ର ବିରୋଧରେ ତାଙ୍କର ଆଭିମୁଖ୍ୟ ଜୋରଦାର ହେବ । ସେ କୌଣସି ସିବିଆଇ ଏବଂ ଇଡିକୁ ନେଇ ଭୟଭୀତ ନୁହନ୍ତି ବୋଲି କେ.ସି ତ୍ୟାଗୀ କହିଛନ୍ତି ।

Powered by Froala Editor