ଆରଜେଡି ସୁପ୍ରିମୋ ଲାଲୁ ପ୍ରସାଦ ଯାଦବଙ୍କ ପାଇଁ ବଡ଼ ନିଷ୍ପତ୍ତି ନେଇଛନ୍ତି ଝିଅ ରୋଶନୀ ଆଚାର୍ଯ୍ୟ। ଏକାଧିକ ରୋଗରେ ପୀଡ଼ିତ ଥିବା ଆର୍‌ଜେଡି ସୁପ୍ରିମୋ ଲାଲୁ ଯାଦବଙ୍କୁ ଡାକ୍ତର କିଡନୀ ଟ୍ରାନ୍ସପ୍ଲାଣ୍ଟ କରିବାକୁ ପରାମର୍ଶ ଦେଇଥିଲେ। ଏବେ ସିଙ୍ଗାପୁରରେ ରହୁଥିବା ତାଙ୍କ ଝିଅ ରୋଶନୀ ହିଁ ତାଙ୍କୁ କିଡନୀ ଦେବେ ବୋଲି ସୂଚନା ମିଳିଛି। ଲାଲୁଙ୍କ ପରିବାରର ନିକଟତର ଜଣେ ବ୍ୟକ୍ତି ପିଟିଆଇକୁ ଏହି ସୂଚନା ଦେଇଛନ୍ତି।

ଦୀର୍ଘ ବର୍ଷ ହେଲା ଲାଲୁ ପ୍ରସାଦ କିଡ୍‌ନୀ ଓ ଅନ୍ୟାନ୍ୟ ରୋଗରେ ଆକ୍ରାନ୍ତ ହୋଇ ଚିକିତ୍ସିତ ହେଉଛନ୍ତି। ଏବେ ତାଙ୍କ ଅବସ୍ଥା ଅଧିକ ବିଗୁଡ଼ୁ ଥିବାରୁ ତାଙ୍କୁ ନୂଆ ଜୀବନ ଦେବାକୁ ନିଷ୍ପତ୍ତି ନେଇଛନ୍ତି ରୋଶନୀ। ସେ ଲାଲୁ ପ୍ରସାଦଙ୍କୁ ତାଙ୍କର ଗୋଟିଏ କିଡ୍‌ନୀ ଦାନ କରିବେ। ଏହା ଲାଲୁଙ୍କୁ ଦୀର୍ଘାୟୁ କରିବ ବୋଲି ଆଶା କରାଯାଉଛି।

୭୪ ବର୍ଷୀୟ ଯାଦବ ଗତମାସରେ କିଡନୀ ଚିକିତ୍ସା ପାଇଁ ସିଙ୍ଗାପୁର ଯାଇ ଫେରିଛନ୍ତି। ବର୍ତ୍ତମାନ ସେ ଦିଲ୍ଲୀରେ ଅଛନ୍ତି। ଗୋଖାଦ୍ୟ ଦୁର୍ନୀତି ମାମଲାରେ ଜେଲ୍‌ ଦଣ୍ଡରେ ଦଣ୍ଡିତ ଥିବା ଲାଲୁ ସ୍ୱାସ୍ଥ୍ୟଗତ କାରଣରୁ ବେଲ୍‌ରେ ଅଛନ୍ତି। ବେଲ୍‌ରୁ ଆସିବା ପରେ ସେ ଅନେକ ସମୟରେ ରାଞ୍ଚି ଓ ଦିଲ୍ଲୀ ମେଡିକାଲ୍‌ରେ ଚିକିତ୍ସା ହେଉଛନ୍ତି। ତେବେ ଲାଲୁଙ୍କର କିଡନୀ ଟ୍ରାନ୍ସପ୍ଲାଣ୍ଟ କେବେ ଓ କେଉଁଠି ହେବ ସେ ନେଇ କୌଣସି ସୂଚନା ମିଲିପାରି ନାହିଁ।

Powered by Froala Editor