ଯୋଧପୁର: ରାଜସ୍ଥାନ ଯୋଧପୁରର ମାଗ୍ରା ପୁଞ୍ଜଲାରେ ଆଜି ଏକ ବଡ଼ ଧରଣର ଅଘଟଣ ଘଟିଛି । ଗ୍ୟାସ୍ ସିଲିଣ୍ଡର ରି-ଫିଲିଂ କରିବା ବେଳେ ବିସ୍ଫୋରଣ ହେଇଛି । ଏଥିରେ ଗୋଟିଏ ପରିବାରର ୪ ସଦସ୍ୟଙ୍କ ମୃତ୍ୟୁ ଘଟିଥିବା ବେଳେ ୧୬ରୁ ଅଧିକ ଆହତ ହୋଇଛନ୍ତି । ଏକାଧିକ ଗାଡ଼ି ପୋଡ଼ି ନଷ୍ଟ ହୋଇଯାଇଛି । ସ୍ଥାନୀୟ ଅଗ୍ନିଶମ ବିଭାଗ କର୍ମଚାରୀ ଓ ପୁଲିସ୍ ପହଂଚି ଉଦ୍ଧାର କାର୍ଯ୍ୟ ଜାରି ରଖିଛନ୍ତି । ଆହତଙ୍କୁ ନିକଟସ୍ଥ ମହାତ୍ମା ଗାନ୍ଧି ହସ୍ପିଟାଲରେ ଭର୍ତି କରାଯାଇଛି । ସେମାନଙ୍କ ମଧ୍ୟରୁ କିଛି ଜଣଙ୍କ ସ୍ୱାସ୍ଥ୍ୟାବସ୍ଥା ଗୁରୁତର ଥିବାରୁ ମୃତକଙ୍କ ସଂଖ୍ୟା ବଢ଼ିପାରେ ବୋଲି ଆଶଙ୍କା କରାଯାଉଛି ।

ମାଗ୍ରା ପୁଞ୍ଜଲା ଅଂଚଳରେ ଥିବା ଏକ ଆବାସିକ କଲୋନୀରେ ଏହି ଅଘଟଣ ଘଟିଛି । ଏଠାରେ ରହୁଥିବା ଜଣେ ବ୍ୟକ୍ତି ଘରେ ବେଆଇନ ଭାବେ ଗ୍ୟାସ୍ ସିଲିଣ୍ଡର ରି-ଫିଲିଂ କରୁଥିଲେ । ଏହି ସମୟରେ କୌଣସି କାରଣରୁ ଗୋଟିଏ ସିଲିଣ୍ଡର ଫାଟି ଯାଇଥିଲା । ଏହାପରେ ସେଠାରେ ଥିବା ୪ରୁ ୬ଟି ସିଲିଣ୍ଡର ବିସ୍ଫୋରଣ ହୋଇଥିଲା । ଚାହୁଁ ଚାହୁଁ ଘରେ ନିଆଁ ଲାଗି ଯାଇଥିଲା । ଏହି ସମୟରେ ପରିବାର ଭିତରେ ପ୍ରାୟ ୨୦ ଜଣ ସଦସ୍ୟ ଥିଲେ । ସମସ୍ତେ ଅଗ୍ନିକାଣ୍ଡରେ ପୋଡ଼ି ଯାଇଥିଲେ । ଏଥିସହ ଘର ବାହାରେ ରଖାଯାଇଥିବା ଏକାଧିକ ବାଇକ ଓ କାର୍ ମଧ୍ୟ ନିଆଁରେ ପୋଡ଼ି ପାଉଁଶ ହୋଇଯାଇଥିଲା । ବିସ୍ଫୋରଣ ଏତେ ଭୟଙ୍କର ଥିଲା ଯେ ଆଖପାଖ ଅଂଚଳର କିଛି ଘର ଦୋହଲି ଯାଇଥିଲା । ଖବରପାଇ ଦମକଳ ବାହିନୀ ଓ ସ୍ଥାନୀୟ ପୁଲିସ୍ ଘଟଣାସ୍ଥଳରେ ପହଂଚିଥିଲେ । ସେମାନେ ନିଆଁକୁ ଆୟତ କରିଥିଲେ । ହେଲେ ସେତେବେଳକୁ ୪ ଜଣଙ୍କ ମୃତ୍ୟୁ ଘଟି ସାରିଥିଲା । କେଉଁ କାରଣରୁ ଅଗ୍ନିକାଣ୍ଡ ଘଟିଲା ତାହାର ତଦନ୍ତ ଜାରି ରହିଥିବା ସ୍ଥାନୀୟ ପ୍ରଶାସନ ପକ୍ଷରୁ କୁହାଯାଇଛି ।

Powered by Froala Editor