ପୋଷା କୁକୁର ପାଇଁ ବେକରେ ଫାଶି ଲଗାଇ ଆତ୍ମହତ୍ୟା କରିଛନ୍ତି ମା’ ଓ ଝିଅ । ଜୀବନ ହରାଇଥିବା ମହିଳା ଜଣଙ୍କ ହେଲେ ୩୬ ବର୍ଷୀୟ ଦିବ୍ୟା ଆର ଓ ତାଙ୍କ ଝିଅ ହୃଦୟା। ହୃଦୟାଙ୍କ ବୟସ ୧୩ ଓ ସେ ୬ଷ୍ଠ ଶ୍ରେଣୀରେ ପାଠପଢ଼ୁଥିଲେ। ପୂର୍ବ ବେଙ୍ଗାଲୁରୁର ବଂଶୱାଡି ସ୍ଥିତ ଏଚବିଆର ଲେୟାଆଉଟରେ ଏପରି ଘଟଣା ଘଟିଛି।

ଦିବ୍ୟାଙ୍କ ବାପା ରମନ ଏମକେ ଅଭିଯୁକ୍ତଙ୍କ ବିରୋଧରେ ପୁଲିସ୍‌ରେ ଦ୍ୱାରସ୍ଥ ହୋଇଥିଲେ। ଗୋବିନ୍ଦପୁରା ପୁଲିସ୍‌ ଦିବ୍ୟାଙ୍କ ସ୍ୱାମୀ ଶ୍ରୀନିବାସ, ଶାଶୁ ବସନ୍ତା ଓ ଶ୍ୱଶୁର ଜନାର୍ଦ୍ଦନଙ୍କ ନାଁରେ ଆଇପିସିର ଧାରା ୩୦୬ରେ ମାମଲା ରୁଜୁ କରିଛି। ମଙ୍ଗଳବାର ଦିବ୍ୟାଙ୍କ ସ୍ୱାମୀ ଶ୍ରୀନିବାସଙ୍କୁ ପୁଲିସ୍‌ ଗିରଫ କରିଛି।

ପୁଲିସ୍‌ କହିଛି, ଦିବ୍ୟା ୨୦୦୮ ମସିହାରେ ଶ୍ରୀନିବାସଙ୍କୁ ବିବାହ କରିଥିଲେ। ସ୍ୱାମୀ ଓ ଶାଶୁ ଘର ଲୋକଙ୍କ ସହ ରହୁଥିବା ଦିବ୍ୟା ବିଗତ କିଛି ବର୍ଷ ହେଲା ଶ୍ୱାସଜନିତ ରୋଗରେ ପୀଡ଼ିତ ଥିଲେ। ଏହାବାଦ ତାଙ୍କର ଚର୍ମ ଆଲର୍ଜି ମଧ୍ୟ ରହିଥିଲା। ଜଣେ ଡାକ୍ତର ତାଙ୍କୁ କୁକୁରମାନଙ୍କ ଠାରୁ ଦୂରେଇ ରହିବାକୁ ପରାମର୍ଶ ଦେଇଥିଲେ। ଯଦି ସେ କୁକୁରମାନଙ୍କ ଠାରୁ ଦୂରେଇ ନ ରହିବେ, ତା’ହେଲେ ତାଙ୍କ ସ୍ୱାସ୍ଥ୍ୟାବସ୍ଥାରେ ସୁଧାର ଆସିବ ନାହିଁ।

ଏ ସମ୍ପର୍କରେ ଦିବ୍ୟା ତାଙ୍କ ସ୍ୱାମୀ ପରିବାର ଲୋକଙ୍କୁ ଅବଗତ କରାଇଥିଲେ। ଏଥିସହ ସେମାନଙ୍କ ଘରେ ରହିଥିବା ପୋଷା କୁକୁରକୁ ଅନ୍ୟକୁ ଦେଇ ଦେବାକୁ ଅନୁରୋଧ କରିଥିଲେ। କିନ୍ତୁ ସେମାନେ ଦିବ୍ୟାଙ୍କ କଥାରେ ରାଜି ହୋଇ ନଥିଲେ। ସୋମବାର ସକାଳ ୭.୩୦ ଯାଏ ଦିବ୍ୟା ଓ ତାଙ୍କ ଝିଅ ନିଜ ରୁମରୁ ବାହରକୁ ଆସି ନଥିଲେ। ଏହି ସମୟରେ ଶ୍ରୀନିବାସ ଦିବ୍ୟା ଓ ତାଙ୍କ ଝିଅ ଘର ଭିତରେ ଫ୍ୟାନରେ କପଡ଼ା ଲଗାଇ ଝୁଲି ପଡ଼ିଥିବା ଦେଖିବାକୁ ପାଇଥିଲେ।