କର୍ଣ୍ଣାଟକାର ବେଲଗାବି ଜିଲ୍ଲା ସ୍ଥିତ ଶ୍ରୀ ଗୁରୁ ମଦିୱାଲେଶ୍ୱର ମଠର ମହନ୍ତ ବସବା ସିଦ୍ଦଲିଙ୍ଗ ସ୍ୱାମୀଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଛି। ସେ ଆତ୍ମହତ୍ୟା କରିଥିବା କୁହାଯାଉଛି। ତାଙ୍କ ରୁମ୍‌ରୁ ଏକ ସୁଇସାଇଡାଲ୍ ନୋଟ୍ ମିଳିଥିବା କୁହାଯାଉଛି। କିନ୍ତୁ ସେ ବିଷୟରେ ପୁଲିସ୍ କିଛି ସୂଚନା ଦେଇ ନାହିଁ। ଏହା ଏକ ଲିଙ୍ଗାୟତ ମଠ ହୋଇଥିବା ବେଳେ ଏହା ପରିସରରେ ଥିବା ଏକ ଘରୁ ମହନ୍ତଙ୍କ ମୃତଦେହ ଉଦ୍ଧାର କରାଯାଇଛି।

ସୋମବାର ସକାଳେ ତାଙ୍କ ଭକ୍ତମାନେ ମଠକୁ ଦର୍ଶନ ପାଇଁ ଆସିଥିବା ବେଳେ ବାବା ଆତ୍ମହତ୍ୟା କରିଥିବା ଦେଖିବାକୁ ପାଇଥିଲେ। ଏହାପରେ ମାମଲା ପୁଲିସ ପାଖରେ ପହଞ୍ଚିବାରୁ ଘଟଣା ସ୍ଥଳରେ ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି। ତେବେ ମୃତଦେହ ପାଖରୁ ଏକ କାଗଜ ଜବତ କରିଛି ପୁଲିସ। ଏହା ସୁଇସାଇଡ୍ ନୋଟ୍ ହେଇଥାଇପାରେ ବୋଲି କୁହାଯାଉଥିବା ବେଳେ ପୁଲିସ ଏନେଇ କୌଣସି ଖୁଲାସା କରି ନାହିଁ।

ସୂଚନା ଅନୁସାରେ ଯୌନ ସମ୍ପର୍କ ଅଭିଯୋଗ ନେଇ ବାବାଙ୍କର ନାଁରେ କଥା ଉଠିଥିଲା। ଦୁଇ ମହିଳା ତାଙ୍କ ବିରୋଧରେ ଯୌନ ନିର୍ଯାତନା ମାମଲା କରିବେ ବୋଲି କଥା ହେଉଥିବା ବେଳେ ଏକ ଅଡିଓ ଶୁଣିବାକୁ ମିଳିଥିଲା। ଦୁଇ ମହିଳା ବାସବ ସିଦ୍ଦାଲିଙ୍ଗଙ୍କ ନାରେ ଅଭିଯୋଗ କରିବେ ବୋଲି ଅଡିଓରେ ଶୁଣାଇଯାଇଥିଲା। ଏହି ଚାପରେ ସେ ଆତ୍ମହତ୍ୟା କରିଥିବା ପୁଲିସ ସୂତ୍ରରୁ ସୂଚନା ମିଳିଛି।

Powered by Froala Editor