ଫିଲ୍ମ୍ ଷ୍ଟାଇଲରେ ଚୋରି କରି ଚୋର ଲେଖିଲେ ଇଟ୍ସ୍‌ ଧୁମ୍ ୪ କମିଙ୍ଗ୍‌ ସୁନ୍‌ । ଏପରି ଚୋରି ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ବ୍ଲକ ଅଞ୍ଚଳରେ ଘଟିଛି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ଚୋରମାନେ ୩ଟି ମୋବାଇଲ୍‌ ନମ୍ୱର ଲେଖି ଯାଇଛନ୍ତି। ଯେଉଁଥିରେ ଜଣେ ସ୍କୁଲର ଶିକ୍ଷକଙ୍କ ମୋବାଇଲ ନମ୍ୱର ଥିବା ବେଳେ ଅନ୍ୟ ଦୁଇଟି କାହାର ଜଣାପଡ଼ି ନାହିଁ। ପୁଲିସ ସାଇଣ୍ଟିଫିକ୍‌ ଟିମ୍‌ ଓ ସନ୍ଧାନୀ କୁକୁର ମାଧ୍ୟମରେ ଘଟଣାର ତଦନ୍ତ ଚଳାଇଛି।

ଶନିବାର ବିଳମ୍ୱିତ ରାତିରେ ତେନ୍ତୁଳିଖୁଣ୍ଟି ବ୍ଲକ ଖାତିଗୁଡା ଇନ୍ଦ୍ରାବତୀ ପ୍ରକଳ୍ପ ଉଚ୍ଚ ବିଦ୍ୟାଳୟରୁ ଚୋରି ହୋଇଛି। ଗତ ଶୁକ୍ରବାର ଦିନ ରଥଯାତ୍ରା ପାଇଁ ସ୍କୁଲ ଛୁଟି ଥିବାରୁ ସ୍କୁଲ ବନ୍ଦ ରହିଥିଲା । ଏହାର ପରଦିନ ଅର୍ଥାତ୍ ଶନିବାର ଦିନ ସ୍କୁଲ ଫାଟକ ଖୋଲିବା ବେଳେ ବିଦ୍ୟାଳୟର ମୁଖ୍ୟ ଫାଟକର ଚାବି ଭାଙ୍ଗି ହୋଇ ପ୍ରଧାନଶିକ୍ଷକଙ୍କ କକ୍ଷରେ ଚୋରି କରିଥିଲେ। ଚୋରମାନେ ପ୍ରଧାନ ଶିକ୍ଷକଙ୍କ କକ୍ଷରେ ଥିବା ଦୁଇଟି ତାଲା ଭାଙ୍ଗି କମ୍ପ୍ୟୁଟର, ପ୍ରିଣ୍ଟର, ଜେରକ୍ସ ମେସିନ, ସାଉଣ୍ଡବକ୍ସ ଇତ୍ୟାଦି ଚୋରି କରି ନେଇଛନ୍ତି।

ଚୋରମାନେ ସ୍କୁଲରେ କଳାକନା ବୁଲାଇବା ପରେ ପୁଲିସ୍‌କୁ ଦେଇଛନ୍ତି ଖୋଲା ଚ୍ୟାଲେଞ୍ଜ। ବ୍ଲକବୋର୍ଡରେ ଇଂରାଜୀରେ ଲେଖିଥିଲେ- ITS ME DHOOM-4 COMMING SOON। ଆଉ ଓଡ଼ିଆରେ ଲେଖିଥିଲେ- “ଆମେ ପୁଣି ଆସିବୁ… ସ୍କୁଲ ପିଲା ଧରିପାରିଲେ ଧର…”। ଏଥି ସହ ବ୍ଲାକବୋର୍ଡରେ ୩ଟି ମୋବାଇଲ ନମ୍ୱର ଲେଖି ଯାଇଛନ୍ତି। ଯେଉଁଥିରେ ସ୍କୁଲର ଶିକ୍ଷକଙ୍କ ମୋବାଇଲ୍‌ ନମ୍ୱର ରହିଛି। ତେବେ ଅନ୍ୟ ଦୁଇଟି ମୋବାଇଲ୍‌ ନମ୍ୱର କାହାର ଜଣାପଡ଼ି ନାହିଁ।