ପୁରୀ:   ଶ୍ରୀମନ୍ଦିର ରୋଷଘର ଚୁଲି ଭାଙ୍ଗିବା ଘଟଣାରେ ୪ ଜଣ ଜଗନ୍ନାଥ ଟେମ୍ପଲ ପୁଲିସ(ଜେଟିପି)ଙ୍କୁ ପଚରାଉଚରା କରାଯାଉଛି ।  ସେମାନଙ୍କୁ ସିଂହଦ୍ୱାର ଥାନା ପୁଲିସ ପଚରାଉଚରା କରୁଛି ।  ୪ ଜଣଙ୍କ ମଧ୍ୟରୁ ଜଣେ ବାଟଅଗଣା ଓ ନାଟମଣ୍ଡପ ଦାୟିତ୍ୱରେ ଥିଲେ ।  ଅନ୍ୟ ୩ ଜଣ ଜେଟିପି ସନ୍ଦିଗ୍ଧ ବ୍ୟକ୍ତିଙ୍କୁ ନେଇ ବାହାରେ ଛାଡ଼ିଥିଲେ ।  ସନ୍ଦିଗ୍ଧ ବ୍ୟକ୍ତିଙ୍କ ଫଟୋକୁ ଧରି ପୁଲିସ ଅନୁସନ୍ଧାନ କରୁଛି ।  ଘଟଣା ଦିନ ଦାୟିତ୍ୱରେ ଥିବା ସେବାୟତଙ୍କୁ ଫଟୋ ଦେଖାଇ ପୁଲିସ ପଚରାଉଚରା କରୁଛି ।  ସନ୍ଧ୍ୟାଧୂପ ପର୍ଯ୍ୟନ୍ତ ଦାୟିତ୍ୱରେ ଥିବା ସେବାୟତଙ୍କୁ ପଚରାଉଚରା କରାଯାଉଛି ।

ଅପରପକ୍ଷରେ ଶ୍ରୀମନ୍ଦିର ଚୁଲି ଭଙ୍ଗା ଘଟଣାକୁ ଶ୍ରୀମନ୍ଦିର ପ୍ରଶାସନ, ଜିଲ୍ଲା ପ୍ରଶାସନ ଓ ପୁଲିସ ବାହିନୀ ଗୁରୁତର ସହ ନେଇଛନ୍ତି  । ଗତକାଲି ନୀତି ପ୍ରଶାସକ ଓ ସୁରକ୍ଷା ପ୍ରଶାସକ ଧୋପଖାଳିଆ, ଅଙ୍ଗାରୁଆ ଓ ରୋଷଦୁଆରି ଆଦି ସେବକଙ୍କୁ ଶ୍ରୀମନ୍ଦିର କାର୍ଯ୍ୟାଳୟକୁ ଡାକି ଘଟଣା ବାବଦରେ ପଚରାଉଚରା କରିଛନ୍ତି  । ମହାପ୍ରଭୂଙ୍କ ବଡ଼ ସିଂହାର ଠାରୁ ପରଦିନ ରୋଷଘର ଘଟଣା ଜଣାପଡ଼ିବା ପର୍ଯ୍ୟନ୍ତ ଯେଉଁମାନେ ଦାୟିତ୍ୱରେ ଥିଲେ ସେମାନଙ୍କ ବୟାନ ରେକଡର଼୍ କରାଯାଇଛି  । ସେହିପରି ସିଂହଦ୍ୱାର, ଭୋଗମଣ୍ଡପ, ଗଙ୍ଗାଯମୁନା କୁଅ ଓ ଦକ୍ଷିଣ ଦ୍ୱାର ସିସିଟିଭି ଯାଂଚ କରାଯାଇଛି  । 

କୋଟି ଓଡ଼ିଆଙ୍କ ତ୍ରାଣକର୍ତ୍ତା ମହାପ୍ରଭୁଙ୍କ ରୋଷଶାଳାରେ ଦୁର୍ବୃତ୍ତ ପଶି ଭାଙ୍ଗି ଦେଲେ ଚୁଲି। ଆଉ ଏକଥା ଜାଣିପାରିଲା ନାହିଁ ଶ୍ରୀମନ୍ଦିର ପ୍ରଶାସନ ଓ ପୁରୀ ଜିଲ୍ଲା ପ୍ରଶାସନ। ଗତକାଲି ସନ୍ଧ୍ୟା ବେଳେ ଶ୍ରୀକ୍ଷେତ୍ରରେ ପହଞ୍ଚିଥିଲେ ମୁଖ୍ୟଶାସନ ସଚିବ ସୁରେଶ ମହାପାତ୍ର ଓ ଡିଜିପି ସୁନୀଲ୍‌ ବଂଶଲ। ଉଭୟ ଶ୍ରୀମନ୍ଦିର ରୋଷଘର ନିକଟ ଅଗଣା ପର୍ୟ୍ୟନ୍ତ ଯାଇ ସ୍ଥିତି ଅନୁଧ୍ୟାନ କରିଥିଲେ।

Powered by Froala Editor