ବକ୍ସ ଅଫିସରେ ରେକର୍ଡ ସୃଷ୍ଟି କରିଛି ଚଳଚ୍ଚିତ୍ର ‘ଦି କାଶ୍ମୀର ଫାଇଲ୍ସ’ । ଏହି ଚଳଚ୍ଚିତ୍ର ପ୍ରେକ୍ଷାଳୟରେ ରିଲିଜ ହେବା ପୂର୍ବରୁ ଅନେକ ବିବାଦ ଘେରକୁ ଆସିଥିଲା । କଶ୍ମୀରୀ ପଣ୍ଡିତଙ୍କ ନରସଂହାରର ଏମିତି ଏକ ସତ୍ୟ ଘଟଣା ଯାହାକୁ ଏତେ ବର୍ଷ ପର୍ଯ୍ୟନ୍ତ କୌଣସି ନିର୍ଦ୍ଦେଶକ ଦେଖାଇବାକୁ ସାହାସ କରି ପାରିନଥିଲେ। କିନ୍ତୁ ଏହା କରି ଦେଖାଇଛନ୍ତି ବିବେକ ଅଗ୍ନିହୋତ୍ରୀ। ଫିଲ୍ମରେ କଶ୍ମୀରର ସବୁଠୁ ଗମ୍ଭୀର ଏବଂ ସମ୍ବେଦନଶୀଳ ପ୍ରସଙ୍ଗକୁ ଦର୍ଶକଙ୍କ ସାମ୍ନାରେ ରଖିଛନ୍ତି। ସ୍ଵାଧୀନତା ପରେ ଘାଟିରେ ଯେଉଁ ଘଟଣା ଘଟିଥିଲା ତାହା ହୃଦୟ ବିଦାରକ ଥିଲା। ହେଲେ ଏହାକୁ ପରଦାରେ ଦେଖାଇବା ସେତେଟା ସହଜ କାମ ନଥିଲା। ମାତ୍ର ଚଳଚ୍ଚିତ୍ରଟି ରିଲିଜ୍ ହେବା ଦିନଠାରୁ ଫିଲ୍ମ ଆଶା ଠାରୁ ଭଲ ପ୍ରଦର୍ଶନ କରୁଛି ।

‘ଦ କଶ୍ମୀର ଫାଇଲ୍ସ’କୁ ଲୋକେ ହୃଦୟରୁ ବେଶ୍ ପ୍ରଶଂସା କରୁଛନ୍ତି। କେବଳ ଏତିକି ନୁହେଁ ଦର୍ଶକଙ୍କ ଚାହିଦାକୁ ଦୃଷ୍ଟିରେ ରଖି ସୀମିତ ସ୍କ୍ରିନ ସହିତ ରିଲିଜ୍ ହୋଇଥିବା ଏହି ଫିଲ୍ମ ପାଇଁ ସ୍କ୍ରିନ ସଂଖ୍ୟା ବଢାଇ ଦିଆଯାଇଛି।

ପ୍ରଭାସଙ୍କ ଷ୍ଟାରର ଫିଲ୍ମ ‘ରାଧେ ଶ୍ୟାମ’ ଏବଂ ‘ଦ କଶ୍ମୀର ଫାଇଲ୍ସ’ ଗୋଟିଏ ଦିନ ମାର୍ଚ୍ଚ ୧୧ରେ ରିଲିଜ୍ ହୋଇଥିଲା। ଖବର ମୁତାବକ ପ୍ରଭାସଙ୍କ ଫିଲ୍ମ ରାଧେ ଶ୍ୟାମ କାରଣରୁ ଏହି ଫିଲ୍ମକୁ କେବଳ ୬୫୦ ସ୍କ୍ରିନ ସହିତ ଦେଶବ୍ୟାପୀ ରିଲିଜ୍ କରାଯାଇଥିଲା। ଏମିତିରେ ଦର୍ଶକଙ୍କ କହିବା କଥା ଏକ ଭଲ ଫିଲ୍ମ ଏବଂ ଜରୁରୀ ଫିଲ୍ମ ହୋଇଥିବା ପରେ ମଧ୍ୟ ଏହାକୁ ଏତେ କମ ସ୍କ୍ରିନରେ କାହିଁକି ପ୍ରଦର୍ଶିତ କରାଯାଉଛି। ତେଣୁ ଦର୍ଶକଙ୍କ ଦାବି ପରେ ରବିବାର ପର୍ଯ୍ୟନ୍ତ ଫିଲ୍ମର ସ୍କ୍ରିନ ସଂଖ୍ୟା ୬୫୦ରୁ ବଢାଯାଇ ୨୦୦୦ କରି ଦିଆଯାଇଛି। ଏହି ଚଳଚ୍ଚିତ୍ର ରବିବାର ଦିନ ପ୍ରାୟ ୧୪ କୋଟି ଆୟ କରିଛି। ରବିବାର ହୋଇଥିବା ଆୟ ପରେ ଏହା ନିଜେ ହିଁ ନିଜର ଏକ ସ୍ୱତନ୍ତ୍ର ରେକର୍ଡ ସୃଷ୍ଟି କରିଛି। କରୋନା ପରେ ଏହା ପ୍ରଥମ ସୁପରହିଟ୍‍ ଚଳଚ୍ଚିତ୍ର ବୋଲି କୁହାଯାଉଛି।

ଅନ୍ୟପଟେ ହରିୟାଣା, ଗୁଜରାଟ ଏବଂ ମଧ୍ୟ ପ୍ରଦେଶରେ ଏହି ଫିଲ୍ମକୁ ରାଜ୍ୟରେ ଟ୍ୟାକ୍ସ ଫ୍ରି କରିଛନ୍ତି। ଏହି ଫିଲ୍ମରେ ଅନୁପମ ଖେର ଏବଂ ମିଥୁନ ଚକ୍ରବର୍ତ୍ତୀଙ୍କ ଅଭିନୟକୁ ଦର୍ଶକେ ଖୁବ୍ ପ୍ରଶଂସା କରୁଛନ୍ତି। ଫିଲ୍ମରେ ପଲ୍ଲବି ଯୋଶୀ, ଦର୍ଶନ କୁମାର, ଚିନ୍ମୟ ମଣ୍ଡଲେକର, ପୁନିତ ଇସର ପରି ବରିଷ୍ଠ କଳାକାର ପ୍ରଶଂସନୀୟ ଅଭିନୟ କରିଛନ୍ତି। 

Powered by Froala Editor