କର୍ଣ୍ଣାଟକାର ଶିବମୋଗାରେ ଜଣେ ୨୬ ବର୍ଷୀୟ ବଜରଙ୍ଗ ଦଳ ସଦସ୍ୟଙ୍କ ହତ୍ୟା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଯାଇଛି। ଆଜି ଶିବମୋଗ୍ଗାରେ ଲୋକେ ଯାନବାହନ ପୋଡ଼ାଜଳା କରିବା ସହ ଟେକାପଥର ଫିଙ୍ଗିବାରୁ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇଛି। ପୋଡ଼ାଜଳା ଓ ହିଂସକାଣ୍ଡ ଘଟିବାରୁ ଶିବମୋଗାରେ ୧୪୪ ଧାରା ଜାରି କରାଯାଇଛି। ସେହିପରି ବିବାଦକୁ ଦୃଷ୍ଟିରେ ରଖି ଦୁଇ ଦିନ ପାଇଁ ସମସ୍ତ ସ୍କୁଲ ଓ କଲେଜକୁ ବନ୍ଦ କରିଦିଆଯାଇଛି। ପୁଲିସ୍‌ ଫ୍ଲାଗମାର୍ଚ୍ଚ କରୁଥିବା ବେଳେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି।

ଏସବୁ ଭିତିରେ ଟୁଇଟ୍‌ କରି କର୍ଣ୍ଣାଟକର ମୁଖ୍ୟମନ୍ତ୍ରୀ ବୋମ୍ମଇ ରାଜ୍ୟରେ ଶାନ୍ତି ବଜାୟ ରଖିବାକୁ ଜନସାଧାରଣଙ୍କୁ ଅନୁରୋଧ କରିଛନ୍ତି। ସେ କହିଛନ୍ତି, ଶିବମୋଗ୍ଗାରେ ହିନ୍ଦୁ କର୍ମୀ ହର୍ଷଙ୍କ ହତ୍ୟା ଘଟଣାରେ ଅତ୍ୟନ୍ତ ଦୁଃଖିତ। ତଦନ୍ତ ଚାଲିଛି ଏବଂ ଅଭିଯୁକ୍ତମାନଙ୍କୁ ଅବିଳମ୍ବେ ଗିରଫ କରାଯିବ।

ଅନ୍ୟପକ୍ଷରେ ଘଟଣାକୁ ନେଇ ରାଜନୀତି ମଧ୍ୟ ଆରମ୍ଭ ହୋଇଯାଇଛି। କର୍ଣ୍ଣାଟକାର ଗ୍ରାମାଞ୍ଚଳ ବିକାଶ ମନ୍ତ୍ରୀ କେଏସ୍‌ ଈଶ୍ୱରପ୍ପା ଘଟଣା ପାଇଁ କଂଗ୍ରେସ ନେତା ଡିକେ ଶିବକୁମାରଙ୍କ ବୟାନକୁ ଦାୟୀ କରିଛନ୍ତି। ହିଜାବ ବିବାଦ ବେଳେ ସେ ବୟାନ ଦେଇ ଲୋକଙ୍କୁ ହତ୍ୟାକାଣ୍ଡ ପାଇଁ ଉସକାଇଥିବା ମନ୍ତ୍ରୀ ଜଣଙ୍କ ଅଭିଯୋଗ କରିଛନ୍ତି।କର୍ଣ୍ଣାଟକାରେ କ୍ଷମତାରେ ଥିବା ବିଜେପି ସରକାରର ଜଣେ ମନ୍ତ୍ରୀ ହତ୍ୟା କାଣ୍ଡ ପଛରେ ମୁସଲିମ ଗୁଣ୍ଡାଙ୍କ ହାତ ଥିବା ବୟାନ ଦେଇଛନ୍ତି। ତେଣୁ ସାଂପ୍ରଦାୟିକ ହିଂସା ସୃଷ୍ଟି ହେବାର ଆଶଙ୍କା ପ୍ରକାଶ ପାଇଛି।

୨୬ ବର୍ଷୀୟ ହର୍ଷଙ୍କୁ ରବିବାର ସନ୍ଧ୍ୟାରେ ୪ ଜଣ ଯୁବକ ଛୁରୀ ଭୁସି ହତ୍ୟା କରିଥିଲେ। ଏହାପରେ ନିହତ ବଜରଙ୍ଗ ଦଳର ହର୍ଷଙ୍କ ଶବ ବ୍ୟବଚ୍ଛେଦ କରାଯିବା ପରେ ଆଜି ପୂର୍ବାହ୍ନରେ ଡାକ୍ତରଖାନାରୁ ତାଙ୍କ ଘର ସୀଗେହାଟ୍ଟିକୁ ନିଆଯାଇଥିଲା। ପୁଲିସ ମଧ୍ୟ ୩ଜଣ ସନ୍ଦିଗ୍ଧଙ୍କୁ ଧରି ନେଇ ଜେରା କରୁଛି।

Powered by Froala Editor