ଦୁର୍ଘଟଣାରେ ପଞ୍ଜାବୀ ଅଭିନେତା ଦୀପ ସିଦ୍ଧୁଙ୍କ ମୃତ୍ୟୁ, ବଞ୍ଚିଗଲେ ପ୍ରେମିକା ରୀନା
ଦୁର୍ଘଟଣାରେ ପଞ୍ଜାବୀ ଅଭିନେତା ଦୀପ ସିଦ୍ଧୁଙ୍କ ମୃତ୍ୟୁ ଘଟିଛି । ୩୭ ବର୍ଷୀୟ ଦୀପ ସିଦ୍ଧୁ ଆଜି ରାତି ପ୍ରାୟ ୯.୩୦ରେ ଦିଲ୍ଲୀରୁ ପଞ୍ଜାବର ଭାଟିଣ୍ଡା ଯାଉଥିଲେ। ତେବେ କୁଣ୍ଡଲି-ମାନେସର-ପାଲୱାଲ ଏକ୍ସପ୍ରେସ ୱେରେ ଅଘଟଣ ଘଟିଥିଲା। ସେ ଯାଉଥିବା କାର୍ଟି ରାସ୍ତା କଡ଼ରେ ଛିଡ଼ା ହୋଇଥିବା ଗୋଟିଏ ଟ୍ରକ୍କୁ ଧକ୍କା ଦେଇଥିଲା। ଫଳରେ ଘଟଣା ସ୍ଥଳରେ ସିଦ୍ଧୁଙ୍କ ମୃତ୍ୟୁ ହୋଇଛି।
ଦୁର୍ଘଟଣାରେ ସିଦ୍ଧୁଙ୍କ ମୃତ୍ୟୁ ଘଟିଥିବା ସୋନିପତ ପୁଲିସ୍ ନିଶ୍ଚିତ କରିଛି। ହେଲେ କାର୍ ମଧ୍ୟରେ ଆଉ କେଉଁମାନେ ଥିଲେ ଓ ସେମାନଙ୍କ ଅବସ୍ଥା କେମିତି ଅଛି, ସେ ସମ୍ପର୍କରେ ବିସ୍ତୃତ ତଥ୍ୟ ଏଯାଏ ମିଳିନି। କିନ୍ତୁ ମିଳିଥିବା ଖବର ଅନୁଯାୟୀ, ଦୁର୍ଘଟଣା ବେଳେ ସିଦ୍ଧୁଙ୍କ ପ୍ରେମିକା ରୀନା ରାୟ ମଧ୍ୟ ଥିଲେ। ସେ ଆହତ ହୋଇ ଡାକ୍ତରଖାନାରେ ଭର୍ତ୍ତି ହୋଇଛନ୍ତି। ରୀନା ଏବଂ ଦୀପ ଏକାଠି ଭାଲେଣ୍ଟାଇନ ଡେ ପାଳନ କରିଥିଲେ। ତାଙ୍କର ଶେଷ ଫଟୋ ସୋସିଆଲ ମିଡିଆରେ ଭାଇରାଲ ହୋଇଛି।
ଗତବର୍ଷ କୃଷକଙ୍କ ଆନ୍ଦୋଳନ ସମୟରେ ଦୀପ ଚର୍ଚ୍ଚାକୁ ଆସିଥିଲେ। ଚାଷୀମାନେ କରିଥିବା ଟ୍ରାକ୍ଟର ରାଲି ବେଳେ ପ୍ରବଳ ହିଂସାକାଣ୍ଡ ଘଟିଥିଲା। ଦୀପ ସିଦ୍ଧୁ ଚାଷୀଙ୍କୁ ଉସକାଇ ଲାଲକିଲ୍ଲାରେ ଶିଖ ପତାକା ଉଡ଼ାଇବା ସହ ହିଂସାକାଣ୍ଡ ଘଟାଇବା ଅଭିଯୋଗରେ ଫସିଥିଲେ।
Powered by Froala Editor
