ଜନଧନ ଆକାଉଣ୍ଟରେ ୧୫ ଲକ୍ଷ ପାଇ ଘର କଲେ କୃଷକ, ୬ ମାସ ପରେ ବ୍ୟାଙ୍କ କହୁଛି ଭୁଲ୍ରେ ପଡ଼ିଥିଲା
![ଜନଧନ ଆକାଉଣ୍ଟରେ ୧୫ ଲକ୍ଷ ପାଇ ଘର କଲେ କୃଷକ, ୬ ମାସ ପରେ ବ୍ୟାଙ୍କ କହୁଛି ଭୁଲ୍ରେ ପଡ଼ିଥିଲା](https://odishanewslens.com/news_gallery/10654_1644486929.jpg)
କୃଷକଙ୍କ ଜନଧନ ଆକାଉଣ୍ଟରେ ପଡିଲା ୧୫ ଲକ୍ଷ ଟଙ୍କା । ଏଥିରେ ଖୁସି ହୋଇ ସେ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଦେଲେ ଏବଂ ଘର ତୋଳିଦେଲେ । ହେଲେ ସେ କ’ଣ ଜାଣିଥିଲେ ଏତେ ଦିନ ପରେ ବ୍ୟାଙ୍କ୍ ଏହାକୁ ଭୁଲ୍ କହି ଟଙ୍କା ମାଗିବ? ଏଭଳି ଘଟଣା ଘଟିଛି ମହାରାଷ୍ଟ୍ରର ଜ୍ଞାନେଶ୍ୱର ଜନାର୍ଦ୍ଧନ ଓଟେଙ୍କ ସହ ।
ସୂଚନା ଅନୁସାରେ, ମହାରାଷ୍ଟ୍ର ରାଜ୍ୟର ଔରଙ୍ଗାବାଦ ଜିଲ୍ଲା ଅନ୍ତର୍ଗତ ପୈଠକ ଗ୍ରାମର ବାସିନ୍ଦା ଜ୍ଞାନେଶ୍ବର ଜନାର୍ଦ୍ଧନ ଓଟେଙ୍କ ‘ବ୍ୟାଙ୍କ୍ ଅଫ୍ ବରୋଦା’ରେ ଥିବା ତାଙ୍କ ‘ଜନଧନ ଆକାଉଣ୍ଟ୍’କୁ ୨୦୨୧ ଅଗଷ୍ଟ ୧୭ ତାରିଖରେ ୧୫ ଲକ୍ଷ ୩୪ ହଜାର ୬୨୪ ଟଙ୍କା ଆସିଥିଲା । ବିସ୍ମିତ ଜ୍ଞାନେଶ୍ବର କିଛି ମାସ ଅପେକ୍ଷା କଲେ କିନ୍ତୁ, ଆକାଉଣ୍ଟ୍ରୁ ଟଙ୍କା ଫେରସ୍ତ ନିଆଗଲା ନାହିଁ କି, ଏ ସଂକ୍ରାନ୍ତରେ କେହି ତାଙ୍କ ସହ କୌଣସି ପ୍ରକାର ଯୋଗାଯୋଗ କଲେ ନାହିଁ।
ଏହାପରେ ତାଙ୍କ ଆକାଉଣ୍ଟକୁ ୧୫ ଲକ୍ଷ ଟଙ୍କା ଟ୍ରାନ୍ସ୍ଫର୍ କରି ୨୦୧୪ରେ ପ୍ରଧାନମନ୍ତ୍ରୀ ଦେଇଥିବା ପ୍ରତିଶ୍ରୁତି ପୂରଣ କରିଛନ୍ତି ବୋଲି ସେ ଭାବିଲେ। ବେଶ୍ ଖୁସିରେ ସେ ନିଜ ପାଇଁ ଏକ ନୂଆ ଘରଟିଏ ତୋଳିବା ପାଇଁ ୯ ଲକ୍ଷ ଟଙ୍କା ଉଠାଇଲେ। ନିଜ ପାଇଁ ଏକ ଘର ମଧ୍ୟ ତୋଳିଦେଲେ। ଧନ୍ୟବାଦ ଜ୍ଞାପନ କରି ସେ ପ୍ରଧାନମନ୍ତ୍ରୀଙ୍କୁ ସେ ବାବଦରେ ଚିଠି ବି ଲେଖିଲେ। ହେଲେ ଟଙ୍କା ଆସିବାର ୬ମାସ ପରେ ଏବେ ତାଙ୍କ ପାଦ ତଳୁ ମାଟି ଖସି ଯାଇଛି।
କିଛି ମାସ ପରେ ବ୍ୟାଙ୍କ୍ର ଅଭ୍ୟନ୍ତରୀଣ ତଦନ୍ତରୁ ଜଣାପଡ଼ିଲା ଯେ, ଭୁଲ୍ ଆକାଉଣ୍ଟ୍ରେ ଅର୍ଥ ପୈଠ ହୋଇଯାଇଛି। ସେତେବେଳକୁ ୬ ମାସ ବିତି ଗଲାଣି। ଏହା ପରେ ଟଙ୍କା ଫେରାଇବା ପାଇଁ ହଠାତ୍ ବ୍ୟାଙ୍କ୍ରୁ ବ୍ୟାଙ୍କ୍ରୁ ଆସିଥିବା ନୋଟିସ୍ ଦେଖି ଜ୍ଞାନେଶ୍ବର ଅବାକ୍ ହୋଇଯାଇଥିଲେ। ତାଙ୍କ ଆକାଉଣ୍ଟ୍ରେ ଥିବା ବାକି ୬ ଲକ୍ଷ ଟଙ୍କା ବ୍ୟାଙ୍କ୍ ଫେରାଇ ନେଇଥିଲା। କିନ୍ତୁ, ଏବେ ବ୍ୟାଙ୍କ୍ କର୍ମଚାରୀମାନେ ଜ୍ଞାନେଶ୍ବରକୁ ଅନୁରୋଧ କରି କହୁଛନ୍ତି କି, ସେ ନୂଆ ଘର ତିଆରିରେ ବ୍ୟୟ କରିଥିବା ୯ ଲକ୍ଷ ଟଙ୍କା ଫେରସ୍ତ ଦିଅନ୍ତୁ। ତେଣୁ ଏତେ ଟଙ୍କା ସେ କେଉଁଠୁ ଆଣିବେ ବୋଲି ଚିନ୍ତାରେ ପଡିଛନ୍ତି ।
Powered by Froala Editor