ବିଜେପି ଯୁବ ମୋର୍ଚ୍ଚା ସଦସ୍ୟ ପାମେଲା ଗୋସ୍ୱାମୀଙ୍କ ଠାରୁ କୋକେନ ମିଳିବା ଘଟଣାରେ ଆଜି କୋଲକାତା ପୁଲିସ୍‌ ଆଉ ଜଣଙ୍କୁ ଗିରଫ କରିଛି। ଗିରଫ ବ୍ୟକ୍ତି ଜଣଙ୍କ ହେଉଛନ୍ତି ବେଙ୍ଗଲ ବିଜେପି ୟୁନିଟର କମିଟି ସଦସ୍ୟ ରାକେଶ ସିଂହ। ତାଙ୍କୁ ପୂର୍ବ ବର୍ଦ୍ଧମାନ ଜିଲ୍ଲାର ଗ୍ଲାସିଠାରୁ ଗିରଫ କରାଯାଇଛି। ରାକେଶଙ୍କ ଗିରଫଦାରୀର କିଛି ସମୟ ପୂର୍ବରୁ ତାଙ୍କର ଦୁଇ ପୁଅଙ୍କୁ ହେପାଜତକୁ ନେଇଥିଲା ପୋଲିସ ।

ସେ ସଡ଼କ ପଥରେ ପଶ୍ଚିମବଙ୍ଗ ବାହାକୁ ଫେରାର ହେବାକୁ ଚେଷ୍ଟା କରୁଥିବା ବେଳେ କୋଲକାତା ପୁଲିସ୍‌ର ଡିଟେକ୍ଟିଭ ବିଭାଗ ତାଙ୍କୁ ଗିରଫ କରିଛି। ଆଜି ପୁଲିସ୍‌ ରାକେଶଙ୍କ ଘରେ ରେଡ୍‌ କରିବାକୁ ଉଦ୍ୟମ କରିବା ବେଳେ ତାଙ୍କର ଦୁଇ ପୁଅ ଏଥିରେ ବାଧା ସୃଷ୍ଟି କରିଥିଲେ। ସର୍ଚ୍ଚ ୱାରେଣ୍ଟ ଦେଖାଇବାକୁ କହି ପୁଲିସ୍‌କୁ ସେମାନେ ଘର ବାହାରେ ଦୀର୍ଘ ସମୟ ଅଟକାଇଥିଲେ। ଏହି କାରଣରୁ ରାକେଶଙ୍କ ଦୁଇ ପୁଅଙ୍କୁ ମଧ୍ୟ ଅଟକ ରଖାଯାଇଛି।

ପୂର୍ବରୁ କୋକିନ୍‌ ଚାଲାଣ ମାମଲାରେ ଗିରଫ ହୋଇଥିବା ବିଜେପି ନେତ୍ରୀ ପାମେଲା ଗୋସ୍ବାମୀ କିନ୍ତୁ ରାକେଶ ସିଂହଙ୍କ ବିରୁଦ୍ଧରେ ତାଙ୍କୁ ଫସାଇଥିବା​‌ ଅଭିଯୋଗ ଆଣିଛନ୍ତି । ଗତ ଫେବୃଆରୀ ୧୯ ତାରିଖରେ କୋକିନ୍‌ ରଖିବା ଅଭିଯୋଗରେ ବିଜେପି ନେତ୍ରୀ ପାମେଲା ଗୋସ୍ବାମୀଙ୍କୁ ଗିରଫ କରିଥିଲା ପୋଲିସ । ପାମେଲା ଗିରଫ ହେବା ପରେ ନିଜ ଦଳର ନେତା ରାକେଶ ସିଂହଙ୍କ ବିରୁଦ୍ଧରେ ଫସାଇଥିବା ଅଭିଯୋଗ ଆଣିଥିଲେ । ସେ କହିଛନ୍ତି ଏହି ପୁରା ଘଟଣାର ସିଆଇଡି ଯାଞ୍ଚ କରାଯାଉ ଯାହା ଫଳରେ କି ସତ୍ୟ ସାମ୍ନାକୁ ଆସିପାରିବ ।

ବର୍ତ୍ତମାନ ବିଜେପି ନେତ୍ରୀ ପାମେଲା ଗୋସ୍ବାମୀ ଫେବୃଆରୀ ୨୫ ଯାଏଁ ପୋଲିସ ହେପାଜତରେ ରହିବେ । ପାମେଲାଙ୍କ ସହିତ ତାଙ୍କର ଜଣେ ସହଯୋଗୀଙ୍କୁ ମଧ୍ୟ ପୋଲିସ ଗିରଫ କରିଥିଲା । ତାଙ୍କ ଗାଡିରୁ ପ୍ରାୟ ୧୦୦ ଗ୍ରାମ୍‌ କୋକିନ୍‌ ଜବତ କରିଥିଲା ପୋଲିସ । ଏହି ଘଟଣାରେ ପୋଲିସ ଫେବୃଆରୀ ୨୧ରେ ପାମେଲା ଗୋସ୍ବାମୀଙ୍କ ବ୍ୟୁଟି ପାର୍ଲରରେ ମଧ୍ୟ ଚଢଉ କରିଥିଲା ।

27total visits,1visits today