ମମତାଙ୍କ ପୁତୁରା ତଥା ଟିଏମସି ସାଂସଦ ଅଭିଷେକ ବାନାର୍ଜୀଙ୍କ ଘରେ ସିବିଆଇ ଚଢଉ ହୋଇଛି । କୋଇଲା ଦୁର୍ନୀତି ମାମଲାରେ ଅଭିଷେକଙ୍କୁ ପଚରାଉଚରା କରିବା ପାଇଁ ରବିବାର ସିବିଆଇର ଏକ ଟିମ୍ ସମନ ଜାରି କରିବାକୁ ଅଭିଷେକଙ୍କ ବାସଭବନ ଯାଇଥିଲା । ପଚରାଉଚରା ଲାଗି ୨୪ ଘଣ୍ଟା ମଧ୍ୟରେ ହାଜର ହେବାକୁ ଅଭିଷେକଙ୍କୁ ସିବିଆଇ ନୋଟିସ୍ କରିଛି ।

ତଦନ୍ତକାରୀ ସଂସ୍ଥା ମୁତାବକ, କୋଇଲା ଦୁର୍ନୀତି ମାମଲାରେ ସିବିଆଇ ପଚରାଉଚରା କରିବା ପାଇଁ ଅଭିଷେକଙ୍କୁ ସମନ ଜାରି କରିଛି। ଆସନ୍ତା ୨୪ ଘଣ୍ଟା ମଧ୍ୟରେ ତାଙ୍କୁ ପଚରାଉଚରା କରାଯିବ। କୋଇଲା ଦୁର୍ନୀତି ମାମଲାରେ ଚାଲିଥିବା ତଦନ୍ତରେ ସାମିଲ ହେବାକୁ ତାଙ୍କୁ କୁହାଯାଇଛି।

ପୂର୍ବରୁ ସିବିଆଇ ଅଭିଷେକଙ୍କ ବିଶ୍ୱସ୍ତଙ୍କୁ ଏହି ମାମଲାରେ ଜେରା କରିବା ସହ ସେମାନଙ୍କ ଘରେ ରେଡ୍ କରିଥିଲା । ୨୦୨୦ ଡିସେମ୍ବର ୩୧ରେ କୋଲକାତାରେ ତୃଣମୂଳ ୟୁଥ୍ କଂଗ୍ରେସର ସାଧାରଣ ସମ୍ପାଦକ ବିନୟ ମିଶ୍ରଙ୍କ ଘରେ ଚଢ଼ାଉ କରିଥିଲା ସିବିଆଇ । ବେଆଇନ୍ ଗୋ-ଚାଲାଣକୁ ନେଇ ଏହି ରେଡ୍ କରାଯାଇଥିଲା । ଅଭିଷେକଙ୍କ ଘନିଷ୍ଠ ମଧ୍ୟରୁ ବିନୟ ମିଶ୍ରଙ୍କ ମାଧ୍ୟମରେ ଚ୍ୟାନେଲ କରାଯାଇଥିଲା, ଯାହାର ତଦନ୍ତ ଚାଲିଛି। ସେ ଏହି ମାମଲାରେ ଫେରାର ଅଛନ୍ତି । ତାଙ୍କ ବିରୋଧରେ ଜାମିନ ବିହୀନ ୱାରେଣ୍ଟ ଜାରି କରାଯାଇଛି।

ସିବିଆଇ ୨୦୨୦ ନଭେମ୍ବର ୨୮ରେ କୋଇଲା ଚୋରାଚାଲାଣ ମାମଲାକୁ ନେଇ ୩ ରାଜ୍ୟର ୪୦ରୁ ଅଧିକ ସ୍ଥାନରେ ରେଡ୍ କରିଥିଲା । ପଶ୍ଚିମବଙ୍ଗର କୋଲକାତା ସହ ଆସନସୋଲ୍, ଦୁର୍ଗାପୁର ଓ ରାଣୀଗଞ୍ଜ ଆଦି ଅଞ୍ଚଳରେ ରେଡ୍ ହୋଇଥିଲା ।

33total visits,3visits today