ଅନ୍ୟନ୍ୟା ପଞ୍ଜିକାର ଗଣନା ଭୁଲ୍ ପ୍ର୍ରମାଣିତ ହୋଇଛି । ଚଳିତ ବର୍ଷ ଆଉ ହୋଇପାରିବନି ମହାପ୍ରଭୁଙ୍କ ନାଗାର୍ଜୁନ ବେଶ । ପୂର୍ବରୁ ଯାହାକିଛି କଳ୍ପନାଜଳ୍ପନା ଲାଗି ରହିଥିଲା ସେସବୁରେ ପୂର୍ଣ୍ଣଛେଦ ପକାଇଛନ୍ତି ମୁକ୍ତିମଣ୍ଡପ ସଭାର ସଦସ୍ୟ । ବର୍ଷକ ପାଇଁ ନୀତି ନିର୍ଘଂଟ ପରେ ଶ୍ରୀମନ୍ଦିର ମୁକ୍ତିମଣ୍ଡପ ପଣ୍ଡିତ ସଭାର ସଦସ୍ୟ, ପାଞ୍ଜିଗଣନାକାରୀ ଏବଂ ଶ୍ରୀମନ୍ଦିର ନୀତିପ୍ରଶାସକ ଏହା ସ୍ପଷ୍ଟ କରିଛନ୍ତି । ସେମାନଙ୍କ କହିବା ଅନୁଯାୟୀ ଚଳିତ ବର୍ଷ ନାଗାର୍ଜ୍ଜୁନ ବେଶ ପଡୁନାହିଁ । ଏନେଇ କେତେକ କ୍ୟାଲେଣ୍ଡର ଓ ପଞ୍ଜିକା ଭୁଲ ତଥ୍ୟ ଦେଇଥିଲେ । ଏଭଳି ବିଭ୍ରାନ୍ତିକର ତଥ୍ୟ ଦେଉଥିବା ପାଞ୍ଜିକାରକ ବିରୋଧରେ ଶ୍ରୀମନ୍ଦିର ପ୍ରଶାସନ କଡା କାର୍ଯ୍ୟାନୁଷ୍ଠାନ ନେବାକୁ ମତ ଦେଇଛନ୍ତି ମୁକ୍ତିମଣ୍ଡପ ସଭାର ସଦସ୍ୟ । ସେହିପରି କୋହିନୁର ଏବଂ ରାଧାରମଣ ପଞ୍ଜିକା ଗଣନାକୁ ଶ୍ରୀମନ୍ଦିର ପ୍ରଶାସନ ସ୍ୱୀକୃତି ଦେଇଛି। ଉକ୍ତ ପଞ୍ଜିକାରେ ପ୍ରକାଶିତ ସମସ୍ତ ପର୍ବ ପର୍ବାଣୀ ଶ୍ରୀମନ୍ଦିରରେ ପାଳନ ହେବ ବୋଲି ଶ୍ରୀମନ୍ଦିର ନୀତି ପ୍ରଶାସକ କହିଛନ୍ତି ।

ଗତବର୍ଷ ନଭେମ୍ବର ୨୭ରେ ମହାପ୍ରଭୁ ଶ୍ରୀଜଗନ୍ନାଥଙ୍କ ଦୁର୍ଲଭ ନାଗାର୍ଜୁନ ବେଶ ଅନୁଷ୍ଠିତ ହୋଇଥିଲା । କରୋନା ସଂକ୍ରମଣ ଭୟରେ ବିନା ଭକ୍ତରେ ଏହି ଦୁର୍ଲଭ ବେଶ ଅନୁଷ୍ଠିତ ହୋଇଥିବା ବେଳେ ଚଳିତ ବର୍ଷ ପୁଣି ନାଗାର୍ଜୁନ ବେଶ ପଡିବ ବୋଲି କୁହାଯାଇଥିଲା । ଏପରିକି ସେବାୟତ ମାନେ କହୁଥିଲେ, ଲଗାତର ମହାପ୍ରଭୁଙ୍କ ନାଗାର୍ଜୁନ ବେଶ ପଡିବା ନୁଆ ନୁହେଁ । ୧୯୬୭-୬୮ ଓ ୧୯୯୩-୯୪ରେ ଲଗାତର ନାଗାର୍ଜୁନ ବେଶ ପଡିଥିଲା । ତେଣୁ କୋଭିଡ କଟକଣା ଭିତରେ ମହାପ୍ରଭୁଙ୍କ ଏହି ଦୁର୍ଲଭ ବେଶ ଦେଖିପାରିନଥିବା ଭକ୍ତ ଆଶା କରିଥିଲେ, ଏବର୍ଷ ଶ୍ରୀଜିଉଙ୍କୁ ଯୋଦ୍ଧା ବେଶରେ ଦର୍ଶନ କରିବେ । ହେଲେ ନୁଆ ନୀତି ନିର୍ଘଂଟ ପରେ ଏହି ଆଶା ମଉଳିଯାଇଛି । ଚଳିତ ବର୍ଷ ଶ୍ରୀମନ୍ଦିର ପାଳନ ହେବାକୁ ଥିବା ବିଭିନ୍ନ ପର୍ବ ପର୍ବାଣୀକୁ ଅନୁମୋଦନ ନେଇ ହୋଇଥିବା ବୈଠକ ପରେ ଏହି ମତ ପ୍ରକାଶ ପାଇଛି।

23total visits,1visits today