ପିସିସିଏଫ୍ ଅଭୟକାନ୍ତ ପାଠକଙ୍କ ଘରେ ଭିଜିଲାନ୍ସ ଚଢ଼ାଉ ପରେ ବିପୁଳ ଅର୍ଥ, ସୁନାଗହଣା ଓ ଆୟବର୍ହିଭୂତ ସ୍ଥାବର-ଅସ୍ଥାବର ସଂପତ୍ତି ମିଳିଛି। ଯାହାକି ଭିଜିଲାନ୍ସ ବିଭାଗ ଅଫିସରଙ୍କ ହୋସ୍ ଉଡ଼ାଇ ଦେଇଛି। ଏହା ଓଡ଼ିଶା ଭିଜିଲାନ୍ସର ସବୁଠାରୁ ବଡ଼ ଚଢ଼ାଉ ବୋଲି କୁହାଯାଉଛି। ଗତକାଲିଠାରୁ ଜାରି ରହିଛି ତଲାସୀ, ମିଳୁଛି ଅମାପ ସଂପତ୍ତି ।

ଆଜି ପୁନେରୁ ଭିଜିଲାନ୍ସ ଟିମ୍ ଆଇଏଫଏସ୍ ଅଭୟକାନ୍ତଙ୍କ ପୁଅ ଆକାଶ ପାଠକଙ୍କୁ ଭୁବନେଶ୍ବର ଆଣିଛି। ଆଇଏଫଏସ୍ ଶ୍ରୀ ପାଠକଙ୍କ କାର୍ଯ୍ୟକଳାପ ଯେତିକି ର୍ଦୁନୀତିଗ୍ରସ୍ତ ତାଙ୍କଠୁ ଢ଼େରଗୁଣ ଅଧିକ ବିଳାସପୂର୍ଣ୍ଣ ଜୀବନ ବିତାଇଛନ୍ତି ତାଙ୍କ ପୁଅ ଆକାଶ ପାଠକ। ମୁମ୍ବାଇରେ ବିଳାସପୂର୍ଣ୍ଣ ଜୀବନ ବିତାଉଥିବା ଆକାଶ ଭଡ଼ାରେ ରହିବା ନିମନ୍ତେ ଘରଭଡ଼ା ବାବଦରେ କୋଟିଏ ଟଙ୍କାରୁ ଅଧିକ ଦେଇଥିବାବେଳେ ମୁମ୍ବାଇର ତାଜ୍ ପ୍ୟାଲେସ୍ ହୋଟେଲରେ ୯୦ଲକ୍ଷରୁ ଅଧିକ ଟଙ୍କାର ବିଲ୍ ପୈଠ କରିଛନ୍ତି। କେବଳ ସେତିକି ନୁହେଁ ମାଲେସିଆ, ହଂକଂ, ୟୁକେ, ୟୁଏଇ ଓ ମାଳଦୀପ ଭଳି ଦେଶକୁ ଚାର୍ଟର ପ୍ଲେନରେ ଯିବା ପାଇଁ ୩କୋଟି ଟଙ୍କାରୁ ଅଧିକ ଖର୍ଚ୍ଚ କରିଛନ୍ତି। ଉଭୟ ଅଭୟ ଓ ତାଙ୍କ ପୁଅ ଆକାଶଙ୍କର ଜୀବନଶୈଳୀ ଓ ଜବତ ହେଉଥିବା ଆୟବର୍ହିଭୁତ ସମ୍ପତ୍ତି କୁ ଦେଖିଲେ ରାଜ୍ୟ ରାଜକୋଷକୁ କିଭଳି ଚଳୂ କରାଯାଇଛି ତାହା ଜଣାପଡ଼ୁଛି। ତାଙ୍କୁ ସଂପତ୍ତି ଠୁଳ ନେଇ ଅଧିକ ପଚରାଉଚରା କରାଯିବ। କାରଣ ତାଙ୍କ ନାମରେ ବହୁପରିମାଣରେ ଅର୍ଥ, ଏକାଧିକ ଦାମୀ ଗାଡ଼ି ଓ ସଂପତ୍ତି ରହିଥିବା ସୂଚନା ମିଳିଛି।

ଗତକାଲିଠାରୁ ୧୩ଟି ସ୍ଥାନରେ ଚଢ଼ାଉ ଜାରି ଅଛି । ଏହା ମଧ୍ୟରେ ଅଭୟକାନ୍ତଙ୍କ ସରକାରୀ କାର୍ଯ୍ୟାଳୟ, ସରକାରୀ ବାସଗୃହ, ଭୁବନେଶ୍ୱରସ୍ଥିତ ଫ୍ଲାଟ୍, ଘାଟିକିଆ ବିପୁଲ ଗାର୍ଡେନରେ ଥିବା ସମ୍ପର୍କୀୟଙ୍କ ଘର, ପିପିଲିରେ ଥିବା ଡ୍ରାଇଭରର ଘର, ବିହାର ଖଗାରିଆ ଜିଲ୍ଲାର ବିଷ୍ଣୁପୁରସ୍ଥିତ ପୈତୃକ ବାସଭବନ, ପୁରେ ଥିବା ଦୁଇଟି ବିଳାସୀୟ ଆପାର୍ଟମେଣ୍ଟ (ଗଡସ ବ୍ଲେସିଙ୍ଗ, ୱାଟରସ ଆପାର୍ଟମେଣ୍ଟ), ପୁନେରେ ଥିବା ନିଜ କାର୍ଯ୍ୟାଳୟ, ପୁନେ ମୁଲସିରେ ନିଆଯାଇଥିବା ଭଡ଼ା ଫାର୍ମହାଉସ୍, ପୁନେ ସମତା କଲୋନିରେ ଥିବା ପୁଅର ମ୍ୟାନେଜର ଘର, ମୁମ୍ବାଇର ଜୁହୁ ଓ ମୁଲୁନ୍ଦରେ ଥିବା ପୁଅର ସହଯୋଗୀଙ୍କ ବାସଭବନ ଓ ରେଷ୍ଟୁରାଣ୍ଟ । ଏଥିସହ ଭୁବନେଶ୍ୱର, ମହାରାଷ୍ଟ୍ରର ପୁନେ ଓ ରାଜସ୍ଥାନର ଉଦୟପୁରର ଅନ୍ୟ କେତେକ ସ୍ଥାନରେ ମଧ୍ୟ ତଲାସୀ ଚାଲିଛି । ଏ ପର୍ଯ୍ୟନ୍ତ ଚଢ଼ାଉରେ ନଗଦ ୬୦ ଲକ୍ଷ ଟଙ୍କା, ୮ ଶହ ଗ୍ରାମ ସୁନା, ୨୩ ଲକ୍ଷର ସୁନା କ୍ରୟ କାଗଜପତ୍ର ମିଳିପାରିଛି ।

ପୁଅ ଆକାଉଣ୍ଟରେ ୯.୪ କୋଟି ଟଙ୍କା ରହିଛି । ଏଥିରୁ କେବଳ ୮.୪ କୋଟି ଟଙ୍କା ଭୁବନେଶ୍ୱରର ଏକ ବ୍ୟାଙ୍କରେ ରହିଛି । ଏଥିରୁ ଅଧିକାଂଶ ସହିଦ ନଗରର ଏକ ଏଟିଏମ ଦ୍ୱାରା ଜମା ହୋଇଛି । ଅଭୟକାନ୍ତଙ୍କ ଘରୁ ବିଏମଡବ୍ଲୁ, ମର୍ସିଡିସ, ଟାଟା ହ୍ୟାରିଅର ଭଳି ଦାମୀ କାର ଏବଂ ତିନୋଟି ୟାମା ଏଫଜେଡଏସ ବାଇକ୍ ମିଳିଛି । ପୁନେରେ ତିନୋଟି ମର୍ସିଡିସ୍ ଭଡ଼ାରେ ୨୫ ଲକ୍ଷ ଖର୍ଚ୍ଚ କରାଯାଇଛି । ପୁନେ, ଭୁବନେଶ୍ୱର, ପାଟନା, ଜୁହୁ, ମୁମ୍ବାଇ, ଜାମସେଦପୁର ଏବଂ ଦିଲ୍ଲୀକୁ ଚାର୍ଟର ଫ୍ଲାଇଟରେ ଯିବା ଖର୍ଚ୍ଚ ୩ କୋଟି ହୋଇଥିବା ଜଣାପଡ଼ିଛି ।

96total visits,1visits today